Suno-ya Elvis Presley və Eminemlə bağlı 2 müəllif hüququ iddiası qaldırıldı

    “Suno” süni intellektlə musiqi yaradan platformadır. İndi şirkət Elvis Presley və Eminemlə bağlı yeni müəllif hüquqları iddiaları ilə üzləşib. Elvis Presley musiqisinin hüquqlarını idarə edən qrup və yüzlərlə Eminem yazısının hüquqlarını əlində saxlayan “Eight Mile Style” şirkəti “Suno”ya qarşı ayrıca iddia qaldırıb. Şikayətlərə görə, platforma ifaçıların səsini və yaradıcılıq üslubunu icazəsiz təqlid edib.

    Hər iki iddiada “Suno” ilə yaradılmış konkret mahnı nümunələri göstərilib. Presley işi üzrə mahnıların onun ifasına bənzədiyi deyilir. Eminemlə bağlı işdə isə reperin mahnı sözlərinin təqlid edildiyi iddia olunur. İddiaçıların vəkillərinə görə, belə sistemlər insan yaradıcılığının dəyərini azaldır və illərlə qazanılan bacarığı icazəsiz şəkildə saniyələr ərzində təkrarlayır.

    “Suno” ittihamları rədd edib və sənətçilərin əsərlərindən icazəsiz yararlanmadığını açıqlayıb. Şirkətin qaydaları konkret ifaçı adlarından və mahnılardan istifadəni qadağan edir. Platforma qaydalardan kənar halları aşkarlamaq üçün başqa şirkətlərlə də işləyir. “Suno”ya görə, bu yoxlamalar ehtimal olunan pozuntuların qarşısını almaq üçündür.

    Elvis Presley musiqisinin hüquqlarını idarə edən qrup süni intellekt sahəsində çalışan başqa bir şirkətə qarşı da hüquqi addım atıb. Qrup “Anthropic”dən 41 milyon dollar (təxminən 69,7 milyon manat) təzminat tələb edir. İddiaya görə, “Anthropic” öz süni intellekt modellərini öyrətmək üçün musiqiçinin əsərlərindən icazəsiz yararlanıb və müəllif hüquqlarını pozub.

    “Suno” əvvəllər də oxşar iddialarla üzləşib. “Sony Music Entertainment” və “Universal Music Group” bu ilin əvvəlində məhkəməyə müraciət edib. Şirkətlər yeni “v6” modellərində müəllif hüquqları ilə qorunan materiallardan istifadənin davam etdiyini iddia edir. “Warner Music Group” isə ötən il iddiasından imtina edib və “Suno” ilə lisenziya razılaşması bağlayıb.