Təcrübədə qadın görünüşlü AI köməkçisinə daha az maaş verildi

    İrlandiyanın Limerik Universitetində aparılan yeni araşdırma göstərib ki, süni intellekt agentləri də iş yerindəki gender qərəzindən təsirlənə bilər. AI agenti tapşırıqları müstəqil yerinə yetirən süni intellekt köməkçisidir. Təcrübədə eyni işi görən qadın görünüşlü virtual köməkçiyə kişi görünüşlü köməkçidən daha az maaş ayrılıb. Bu fərq bacarıqdan deyil, yalnız agentlərin fərqli görünüşdə göstərilməsindən yaranıb.

    Araşdırmaya zehni əmək sahəsində çalışan 189 nəfər qatılıb. Onlar virtual reallıqda yaradılmış ofisdə 3 fərqli AI agenti ilə tapşırıqlar yerinə yetiriblər. Agentlərdən biri mətnlə işləyən çatbot, digəri robot görünüşlü masaüstü köməkçi olub. 3-cü agent insana bənzəyib və kişi, yaxud qadın xüsusiyyətləri daşıyıb. İştirakçılar köməkçilərin gördüyü işi qiymətləndirərək onlara maaş ayırıblar.

    İnsana bənzəyən agentlər robot görünüşlü köməkçilərlə müqayisədə daha yüksək qiymət və maaş alıblar. Ancaq kişi və qadın görünüşlü agentlər tamamilə eyni işi görsələr də, “Johan” orta hesabla 10% daha çox maaş alıb. İştirakçılar kişi görünüşlü “Johan”ı qadın görünüşlü “Johanna”dan daha insani sayıblar. Alimlər bu nəticəni real iş yerlərində qadınlarla kişilər arasındakı maaş fərqi ilə müqayisə ediblər.

    Tədqiqatçılar daha sonra 34 iştirakçı ilə müsahibə aparıblar. Onlardan 30-u AI köməkçisinə cinsiyyətindən asılı olmayaraq eyni dərəcədə etibar edəcəyini və eyni mükafat verəcəyini deyib. Yalnız 3 nəfər davranışında gender qərəzi ola biləcəyini qəbul edib. Təkcə 1 iştirakçı qadınlara daha az etibar etdiyini açıq şəkildə söyləyib.

    İştirakçıların ən böyük qrupu qadın görünüşlü AI köməkçisi ilə işləməyə üstünlük verib. Tədqiqatçılar bunu “Siri” və “Alexa” kimi virtual köməkçilərdə əsasən qadın səsinin seçilməsi ilə əlaqələndirirlər. Onların sözlərinə görə, texnologiya şirkətləri qadın səslərini daha yaxın və daha az qorxuducu saydıqları üçün belə seçim edirlər. Buna baxmayaraq, təcrübədə qadın görünüşlü agent daha az insani qəbul olunub və ona daha aşağı maaş ayrılıb.