Ucuz və sürətli Jev Vercel-də ən tez yayılan süni intellekt modeli olub

    “Jev” indiyədək “Vercel” platformasında ən sürətlə yayılan süni intellekt modeli olub. Model 15 sentyabrda məhdud şəkildə çıxıb və ilk 2 həftədə sürətlə populyarlaşıb. Bu müddətin sonunda ondan ödənişli komandaların 35 faizi istifadə edib. “Jev” ikinci ən populyar seçim olan “Sonnet 5.5”dən təxminən 2 dəfə geniş yayılıb.

    “Jev” əvvəlcədən müəyyən edilmiş bir neçə cavab arasından seçim edən sadə qərar modelidir. Cavab variantları məhdud olduğuna görə “Sonnet” kimi alternativlərdən daha ucuz və sürətli işləyir. Model böyük həcmdə məlumatı qısa vaxtda kateqoriyalara ayıra bilir və əsasən sadə seçim tələb edən tapşırıqlar üçündür.

    Bu yanaşma elan ediləndən sonra böyük maraq doğurub. “OpenAI” və “Amazon” da oxşar həllər hazırlayıb. Ancaq indiyədək həmin marağın real istifadəyə çevrildiyini göstərən konkret rəqəmlər az idi. “Vercel” modeli erkən tətbiq edən şirkətlərdən biri olub. Platforma zərərli əmrləri qruplaşdırmaq üçün əvvəl işlədilən “GPT-6 Luna” modelini “Jev”lə əvəzləyib.

    Statistika “Vercel AI Gateway” xidmətindəki istifadəyə əsaslanır. “OpenRouter” kimi işləyən bu xidmət proqramların vahid API, yəni ortaq bağlantı sistemi ilə müxtəlif süni intellekt modellərinə qoşulmasını asanlaşdırır. Lakin rəqəmlər bütün bazarı əhatə etmir. “OpenAI” və “Anthropic” kimi böyük şirkətlərin öz API xidmətləri var. Buna görə onların modellərindən istifadə bu statistikada real göstəricidən az görünə bilər.

    Açıq mənbəli modellərin payı “Vercel” şlüzündə emal olunan tokenlərin 70 faizindən çoxudur. Token süni intellektin emal etdiyi mətn vahididir. Ümumi xərclərin təxminən 25 faizi bu modellərə gedir. Qabaqcıl model hazırlayan laboratoriyalara xərclər 10 dəfə artsa da, onların ümumi xərclərdə payı azalıb. Göstəricilər açıq modellərlə qabaqcıl kommersiya modellərinin bazarda paralel işlədildiyini göstərir.