ABŞ AI çipləri və xaricdəki məlumat mərkəzləri üçün yeni qayda hazırlayır
Tech-Biznes
16.11.2026
ABŞ administrasiyası süni intellekt (AI) çipləri və xaricdəki məlumat mərkəzləri üçün yeni ixrac qaydaları hazırlayır. Müvəqqəti qayda Çin şirkətlərinin 3-cü ölkələrdəki infrastrukturdan uzaqdan yararlanaraq hazırkı məhdudiyyətləri aşmasına mane olmalıdır. Nəzarət çiplərlə yanaşı, serverləri və böyük hesablama gücü verən şəbəkələri də əhatə edəcək.
Qaydaya görə, Ticarət Nazirliyi Çin və digər məhdud ölkələrdəki şirkətlərə hesablama gücü verə biləcək çip və serverlərin ixracı üçün lisenziya istəyəcək. Tələblər Çin, Rusiya, İran, Şimali Koreya və daha 18 ölkənin daxil olduğu D5 embarqo qrupuna aiddir. ABŞ hazırda həmin ölkələrdə yerləşən və ya oradakı bizneslərə məxsus şirkətlərə AI çipi göndərmək üçün də lisenziya tələb edir.
Qayda 12 milyon TPP həddini aşan şəbəkələrə tətbiq ediləcək. TPP ABŞ-nin ixrac nəzarətində hesablama gücünü ölçmək üçün işlətdiyi göstəricidir. Sözügedən hədd təxminən 750 “Nvidia H100” və ya “Nvidia H200” çipinin maksimum gücünə bərabərdir. Vasitəçi və brokerlər üzərindən dolayı çıxış da nəzarət altında olacaq. İxracatçılar və məlumat mərkəzləri müştərilərin kimə məxsus olduğunu, eləcə də nə iş gördüyünü yoxlamalıdır.
Malayziya, Sinqapur, İndoneziya, Tailand və Braziliyaya qabaqcıl yarımkeçiricilərin ixracı, yenidən ixracı və ötürülməsi üçün də lisenziya tələb ediləcək. Nazirliyin fikrincə, həmin ölkələrdə çiplərin başqa istiqamətə göndərilməsi riski normadan yüksəkdir. Ancaq ABŞ şirkətləri üçün ayrılan çiplər bu qaydadan kənarda qalacaq. Hazırda işləyən məlumat mərkəzləri qayda qüvvəyə mindikdən sonra 90 gün ərzində lisenziya almalıdır. Elektron ticarət və sosial media platformalarındakı kommersiya tövsiyə sistemlərinə bu tələb tətbiq edilməyəcək.
Dəyişiklik “Nvidia” şirkətinin həmtəsisçisi Jensen Huangın istefasından bir neçə gün sonra hazırlanıb. İstefa çip istehsalçısının müştərilərindən biri ilə əlaqəli olduğu deyilən Çin casusu qalmaqalından sonra baş verib. Məlumata görə, ABŞ hökuməti “Megaspeed” şirkətini xüsusi məhdudiyyət siyahısına salmaq istəyir. Şirkətin minlərlə “Nvidia” çipi alaraq Çin bizneslərinə hesablama gücü verdiyi və hazırkı qadağaları aşmağa kömək etdiyi güman olunur.
Yeni qayda Bayden administrasiyasının 2025-ci ilin yanvarında qəbul etdiyi “AI Diffusion Rule” çərçivəsini də ləğv edir. Həmin sistem qabaqcıl AI çiplərinin ixracına ölkələr üzrə limit qoyur, bəzi güclü AI modellərinin ötürülməsini də məhdudlaşdırırdı. Tramp administrasiyası may ayında bu çərçivənin ABŞ şirkətləri və müttəfiqləri üçün lazımsız maneələr yaratdığını açıqlamışdı. Yeni nəzarətin məqsədi hərbi və kəşfiyyat işlərində işlədilə biləcək güclü AI modellərinin hazırlanması üçün lazım olan texnologiyaya çıxışı azaltmaqdır.
Şərhlər
Şərh yazmaq üçün Google və ya Facebook hesabınızla daxil olun.
Şərhlər yüklənir...
Ən çox oxunanlar