ABŞ naziri Nvidia-nın Çinə çatan məhdud AI çiplərinə nəzarətini sorğulayıb

    ABŞ-nin maliyyə naziri Skott Bessent “Nvidia”nın satışı məhdudlaşdırılmış süni intellekt (AI) prosessorlarını Çinə ötürən vasitəçi şirkətlərə bilərəkdən satış edib-etmədiyini sorğulayıb. Onun fikrincə, şirkətin müştərilərini düzgün tanıyıb-tanımadığı və prosessorların Çinə çatmasının qarşısını almaq üçün yetərli nəzarət qurub-qurmadığı araşdırılmalıdır. Bessent buna yol verən əməkdaşların məsuliyyət daşımalı olduğunu deyib. Ancaq baş direktor Censen Huanqın prosesdən xəbərdar olduğu hələ təsdiqlənməyib.

    Bessent etiraf edib ki, ABŞ-nin ixrac qaydaları qadağan olunmuş bütün avadanlıqların Çinə və digər rəqib ölkələrə çatmasını dayandıra bilmir. Onun sözlərinə görə, Çin “Nvidia”dan milyonlarla məhdudlaşdırılmış AI qrafik prosessoru almış ola bilər. Nazir yeni və daha sərt qadağalara, eləcə də dövlət qurumlarına əlavə səlahiyyət verilməsinə ehtiyac görmür. O, indiki qaydaların daha düzgün tətbiq edilməsini istəyir.

    Nazir “Nvidia”nın baş hüquq müşaviri Timoti Teteri də tənqid edib. Məlumata görə, Sinqapurda “Megaspeed” əməkdaşı Elis Vonq saxlanıldıqdan sonra Teter ABŞ Ticarət Nazirliyi ilə əlaqə saxlayıb. O, bu addımın arxasında ABŞ qurumlarının olub-olmadığını soruşub. Bessentin fikrincə, hüquq müşaviri dövlət rəsmiləri ilə mübahisə etmək əvəzinə şirkət daxilindəki nəzarətə daha çox diqqət ayırmalı idi. Nazir direktorlar şurasının məsələni ətraflı araşdıracağına inandığını deyib.

    Bessentə görə, Maliyyə Nazirliyi, Müharibə Nazirliyi, Dövlət Departamenti və ABŞ Ticarət Nümayəndəliyi aylardır “Megaspeed”in ixrac məhdudiyyəti qoyulan şirkətlər siyahısına salınmasını dəstəkləyib. Bu qərarı yalnız Ticarət Nazirliyinin Sənaye və Təhlükəsizlik Bürosu verə bilər. Qurumun prosesi aylarla gecikdirdiyi deyilir. İddiaya görə, ticarət naziri Hovard Latnik belə bir addımın Çinlə ticarət gərginliyini artıra biləcəyindən narahat olub.

    Bessent mümkün qanun pozuntusundan bəzi rəhbərlərin xəbərdar olduğu təsdiqlənərsə, “Nvidia”nı hansı nəticələrin gözlədiyini əvvəlcədən deməyib. O vurğulayıb ki, araşdırma bitmədən Censen Huanq barədə nəticə çıxarmaq düzgün deyil. Nazirə görə, satışlar həqiqətən vasitəçi şirkətlər üzərindən aparılıbsa, “Nvidia” daxilindəki yoxlamalar yetərli olmayıb. Bessent məsul şəxslərin şirkət daxilində müəyyənləşdirilməsini vacib sayır.