ABŞ Energetika Nazirliyinin Nəqliyyat Texnologiyaları Ofisi tərəfindən aparılan araşdırmalara görə, 2008-2023-cü illər arasında elektrik avtomobil akkumulyatorlarının istehsal dəyəri 90% azalıb. Bu, istehsalçılara daxili yanma mühərrikli avtomobillərlə elektrikli avtomobillər arasında qiymət fərqini azaltmağa imkan verir. Araşdırmalara görə, litium-ion batareya paketinin istehsal dəyəri 2008-ci ildə 1 kVt/saat üçün 1415 dollar olub, 2023-cü ildə isə bu dəyər 139 dollara düşüb. Buna akkumulyator texnologiyalarının və kimyasının təkmilləşdirilməsi, yeni istehsal proseslərinin inkişafı və istehsal həcminin nəzərəçarpacaq dərəcədə artması böyük təsir göstərir.

     Sözügedən hesabat, ildə ən azı 100 min ədəd istehsal həcmi olan minik və yüngül ticarət avtomobillərini əhatə edir. Təbii ki, 15 illik inflyasiya nəzərə alındıqda fərq o qədər də böyük deyil. 2008-ci ildəki ilkin qiymət, cari dollar dəyərinə görə qiymətləndirildikdə 1000 dollara qədər düşür. Buna baxmayaraq, fərqin təsir edici olduğunu söyləmək olar. Avtomobil istehsalçıları, akkumulyator qiymətlərindəki azalmanın növbəti bir neçə il ərzində də davam edəcəyini gözləyirlər. Gartner bazar təhlili firmasının fikrincə, 2027-ci ilə qədər elektrik avtomobillərinin istehsalının dəyəri daxili yanma ilə işləyən avtomobillərdən daha az olacaq.