Avropa Birliyi TikTok-u 530 milyon avro məbləğində cərimələyib

     Bu həftə Çinə məxsus ByteDance şirkəti - qısa video platforması TikTok-un sahibi - Avropa Birliyində istifadəçi məlumatlarının qorunması ilə bağlı tələblərə əməl etmədiyinə görə 530 milyon avro (600 milyon dollar) məbləğində cərimələnib. Cərimənin səbəbi kimi TikTok-un Avropa Birliyi istifadəçilərinin məlumatlarını guya Çinə ötürməsi göstərilir. İrlandiyanın Məlumatların Qorunması Komissiyası qərara gəlib ki, TikTok şirkətinin Çində yerləşən əməkdaşlarının Avropa Birliyi istifadəçilərinin məlumatlarına çıxış imkanının olmadığını sübut etmələri mümkün olmayıb.

     Qeyd edək ki, Avropa Birliyində qüvvədə olan qanunvericilik istifadəçi məlumatlarının region daxilində saxlanmasını tələb edir. Böyük məbləğdə inzibati cərimədən əlavə olaraq, TikTok-a verilən göstərişə əsasən, şirkət 6 ay ərzində məlumatların emalı prosesini Avropa Birliyi qanunlarının tələblərinə uyğunlaşdırmalıdır. TikTok nümayəndələri bu qərara cavab olaraq tənzimləyici qurumun qərarını mübahisələndirməyə hazır olduqlarını bildiriblər. Şirkət əmindir ki, hazırkı qərar 2023-cü ildə tətbiq olunmuş məlumat təhlükəsizliyi tədbirlərini tam şəkildə nəzərə almır.

     Həmin tədbirlər Avropa Birliyi istifadəçilərinin məlumatlarının Avropa və ABŞ-da yerləşən xüsusi məlumat emal mərkəzlərində saxlanılmasını və uzaqdan çıxışa müstəqil nəzarətin təmin olunmasını nəzərdə tutur. Şirkət əlavə edib ki, indiyədək Çin hökumətindən Avropa Birliyi istifadəçilərinin məlumatlarına çıxışla bağlı heç bir sorğu almayıblar. Hazırda TikTok-un Avropadakı istifadəçi bazası təxminən 175 milyon nəfər təşkil edir. Qeyd edək ki, bu, Çinə məxsus şirkətin regionda aldığı ilk iri cərimə deyil. 2023-cü ildə TikTok Avropa Birliyində uşaqların şəxsi məlumatlarının işlənməsi qaydalarının pozulmasına görə 345 milyon avro məbləğində cərimələnmişdi.

Mənbə: Reuters