Britaniya şirkətlərinin süni intellektə orta illik xərci 27% artıb

    “SAP” hesabatına görə, Böyük Britaniyada bir şirkətin süni intellektə ayırdığı orta illik xərc bu il 20,6 milyon funt sterlinqə çatıb (təxminən 46,49 milyon manat). Ötən il bu məbləğ 16,2 milyon funt sterlinq (təxminən 36,56 milyon manat) idi. Beləliklə, xərclər 27% artıb. Xərclərin 2028-ci ilədək daha 45% yüksələcəyi gözlənilir. Bu halda məbləğ 30 milyon funt sterlinqə (təxminən 67,7 milyon manat) yaxınlaşa bilər.

    Şirkətlər daha çox pul ayırdıqca yatırımlarından əldə etdikləri gəlirin də artacağı proqnozlaşdırılır. Bu göstərici ötən il 17% idi, bu il isə 22%-ə çata bilər. 2028-ci il üçün gözlənti 39%-dir. Ancaq müəssisələrin yalnız 11%-i süni intellektə yatırımları vahid strategiya əsasında idarə edir. Təxminən hər 5 şirkətdən 2-si qərarları bütün şirkət üzrə deyil, ayrı-ayrı şöbələr səviyyəsində verir.

    Tapşırıqları daha müstəqil yerinə yetirən süni intellekt sistemləri də geniş sınaqdan keçirilir. Britaniya şirkətlərinin təxminən 70%-i bu sistemlərlə bağlı pilot layihələr aparır. İstifadəçilər onların maliyyə gəlirini növbəti 2 ildə artıra biləcəyini düşünür. Gözlənilən artım 4,7 dəfədir. Lakin sistemlərin sürətlə işə salınması nəzarət mexanizmlərinin və qaydaların hazırlanmasını qabaqlayır.

    Süni intellekt agentlərindən yararlanan şirkətlərin 49%-i sistemlərin nəzarət mexanizmlərindən daha sürətli tətbiq olunmasından narahatdır. Yalnız 9% idarəetmə bacarığını və mütəxəssis hazırlığını tam yetərli sayır. Şirkətlərin 61%-i qaydaları indi hazırlayır. Digərləri bu sahədə imkanlarının məhdud olduğunu və ya ümumiyyətlə hazır olmadıqlarını deyir.

    Şirkətlər süni intellektdən tam yararlanmağa mane olan əsas problem kimi məlumatların vəziyyətini göstərir. Sorğu iştirakçılarının 71%-i keyfiyyətsiz, 70%-i isə natamam məlumatları maneə sayır. Əlaqəsiz sistemləri problem hesab edənlərin payı 65%-dir. Daha 62% ani məlumatlara çıxışın zəif olduğunu deyir. Buna görə şirkətlərin 67%-i məlumatları vahid sistemdə birləşdirməyin süni intellektə hazırlıq üçün ən vacib addım olacağını düşünür.