DeepSeek təxminən 15 milyard dollar investisiya cəlb edib

    “DeepSeek” ABŞ hökumətinin təhlükəsizlik narahatlığı ilə bağlı qərarından cəmi 2 gün sonra təxminən 15 milyard dollar cəlb edib. Bu, 25,5 milyard manat və ya təxminən 100 milyard yuan edir. Sözügedən maliyyələşmə Çində indiyədək keçirilmiş ən böyük investisiya turlarından biri sayılır. ABŞ hökuməti ölkənin mülki federal qurumlarına şirkətin süni intellekt texnologiyasını sistemlərindən silməyi tapşırıb.

    Potensial investorlar arasında Çinin batareya istehsalçısı “CATL” və “WeChat” xidmətinin sahibi “Tencent” var. “DeepSeek” iyunda 50 milyard dollar (85 milyard manat) dəyərində qiymətləndirilərkən 7 milyard dollar (11,9 milyard manat) toplamışdı. Şirkət iyulda dəyərini 71 milyard dollara (120,7 milyard manat) çatdıraraq daha 1,5 milyard dollar (2,55 milyard manat) cəlb etməyə çalışırdı. “DeepSeek” gələn il Çində birjaya çıxmağı da düşünür.

    “DeepSeek” yeni vəsaitlə süni intellekt modellərini işlədən server və hesablama sistemlərinə daha çox pul xərcləməyi planlaşdırır. Şirkət həm Çin, həm də xarici bazarlar üçün açıq modellər hazırlayır. ABŞ-nin məhdudiyyətlərinə baxmayaraq, Hançjouda yerləşən startap böyüməyə davam edir. Bu addım Çində süni intellekt şirkətləri arasındakı rəqabəti daha da artıra bilər.

    Yeni maliyyələşmə süni intellekt şirkətlərinə böyük sərmayə axınının davam etdiyini göstərir. “Kimi” modelini hazırlayan “Moonshot AI” mayda 20 milyard dollar (34 milyard manat) dəyərində qiymətləndirilib. Şirkət həmin vaxt 2 milyard dollar (3,4 milyard manat) cəlb edib. “Manus AI” də bu ayın əvvəlində 500 milyon dollardan çox (850 milyon manatdan çox) investisiya alıb. Çin şirkətləri qlobal süni intellekt yarışında mövqelərini gücləndirmək üçün xərclərini artırırlar.

    Yanvarda Honq Konq birjasına çıxan “Zhipu AI”, digər adı ilə “Z.ai”, hazırda təxminən 29 milyard dollar (49,3 milyard manat) bazar dəyərindədir. Eyni ay birjaya çıxan “MiniMax” şirkətinin bazar dəyəri təxminən 7,2 milyard dollardır (12,24 milyard manat). Bu rəqəmlər investorların Çinin süni intellekt şirkətlərinə yalnız özəl maliyyələşmə mərhələlərində deyil, birjada da maraq göstərdiyini ortaya qoyur.

    “DeepSeek” 2023-cü ildə Lyanq Venfen tərəfindən yaradılıb. Lyanq startapın ilkin inkişafını maliyyələşdirən “High-Flyer” investisiya fondunun da həmtəsisçisidir. Şirkət 2025-ci ilin əvvəlində pulsuz və açıq parametrli “R1” düşünmə modeli ilə dünyada tanınıb. Əvvəlki maliyyələşmədən sonra Lyanq Venfen “DeepSeek”in Çindəki əməliyyat şirkətində təxminən 81,6 faiz pay saxlayıb. Şirkət yeni investisiya ilə bağlı hələ açıqlama verməyib.