Donald Trump TikTok-un ABŞ-da qadağasını dördüncü dəfə təxirə salmağa hazırdır

     Hələ bu ilin yanvarında keçirilmiş andiçmədən əvvəl Donald Trump ABŞ-da Çin sosial şəbəkəsi TikTok-un taleyini həll etməli olmuşdu, çünki onun fəaliyyəti əvvəlki prezident Joe Biden-in fərmanı ilə qadağan edilmişdi. O vaxtdan bəri TikTok-un ABŞ-da fəaliyyəti üzrə qadağa 3 dəfə təxirə salınıb, lakin Trump bu müddəti yenidən uzatmağa hazır olduğunu bildirib. Xatırladaq ki, ABŞ hakimiyyəti TikTok-un ana şirkəti olan ByteDance-i ölkə ərazisində sosial şəbəkə ilə bağlı aktivləri amerikalı investorların əlinə verməyə məcbur edir. Məsələ olduqca siyasiləşib və bu səbəbdən Ağ Evin hesabının TikTok-da bərpası ilə yenidən platformaya qayıdan Donald Trump bildirib ki, “Xi Jinping ilə danışıqlar lazım olan vaxt keçiriləcək”. Qeyd edək ki, ABŞ və Çin liderlərinin sentyabrın əvvəlində görüşməsi planlaşdırılır.

     ABŞ prezidenti jurnalistlərlə ünsiyyəti zamanı TikTok-dan qaynaqlanan milli təhlükəsizlik təhdidləri ilə bağlı qanunvericilərin narahatlıqlarını dağıtmağa çalışıb. Onun sözlərinə görə, ABŞ hökumətinin bütün müşayiət edən problemləri həll etməyə tam gücü çatır. ABŞ-da TikTok-un fəaliyyətinə qoyulan qadağaya mövcud möhlət Trump tərəfindən 17 sentyabra qədər uzadılıb. O bildirib: “Mən hələ bu mövzuda Xi Jinping ilə danışmamışam. Bu çətin məsələlər həll olunana qədər biz sadəcə müddəti bir az da uzadacağıq”. Prezident əlavə edib ki, ABŞ-da TikTok-u almaq istəyənlər arasında “çox iri” iddiaçılar var. Donald Trump həmçinin özünü “TikTok fanatı” adlandırıb və bu sosial şəbəkədən qaynaqlanan milli təhlükəsizlik təhdidləri ilə bağlı bütün narahatlıqların ciddi şəkildə şişirdildiyini, şəxsən onu narahat etmədiyini söyləyib.