Elon Musk üçün 1 trilyon dollar təzminatdan daha çox Tesla üzərindəki nəzarət önəmlidir

     Gələn ay Tesla səhmdarları şirkətin baş direktoru Elon Musk üçün hazırlanmış yeni əməkhaqqı təzminat planının lehinə və ya əleyhinə səs verəcəklər. Bu planın bütün hədəflərinə nail olunacağı təqdirdə Musk 1 trilyon dollar əldə edəcək və şirkətdəki payını 25%-ə qədər artırmaq imkanı qazanacaq. Tesla direktorlar şurasının sədri Robyn Denholm-un sözlərinə görə, Musk üçün əsas məqsəd pul mükafatından çox şirkətdəki payını artırmaqdır. O, Tesla səhmdarlarını Elon Musk üçün nəzərdə tutulan onillik kompensasiya planını təsdiqləməyə çağırıb, çünki əks halda onun şirkətdən ayrılma ehtimalı böyükdür. Robyn Denholm bu barədə CNBC kanalına verdiyi müsahibədə bildirib: “Elon olmadan Tesla dəyərinin əhəmiyyətli bir hissəsini itirəcək, çünki bizim şirkət artıq hədəflədiyimiz səviyyədə qiymətləndirilə bilməyəcək”.

     Onun fikrincə, Elon Musk-ın Tesla-nın baş direktoru kimi qalması şirkətin biznesi üçün həlledici əhəmiyyət daşıyır, çünki Tesla artıq sadəcə avtomobil istehsalçısı deyil - diqqətini avtopilot sistemlərinə və Optimus adlı insanabənzər robotlara yönəldib. Denholm əmindir ki, hazırda Tesla-nın tarixində dönüş nöqtəsi yaşanır və şirkətin qarşısında yeni imkanlar açılır. Bu imkanların reallaşmasında əsas fiqur isə Elon Musk olaraq qalır. Keçən ay Tesla direktorlar şurası tərəfindən təklif olunan onillik kompensasiya planı Elon Musk-a şirkətin müəyyən hədəflərə çatması halında 12 mərhələdə səhmlərin verilməsini nəzərdə tutur. Bu hədəflərin bəziləri tamamilə real görünür və hətta onların bir hissəsinə nail olunmasa belə, Musk həm Tesla səhmləri, həm də nağd şəkildə 10 milyardlarla dollar dəyərində mükafat alacaq.

     Məsələn, səhmlərin ilk tranşı Tesla-nın bazar dəyəri 2 trilyon dollara çatdıqda Musk-a məxsus olacaq, halbuki hazırda bu göstərici 1.5 trilyon dollar səviyyəsindədir. Sonrakı ödənişlər isə Tesla-nın kapitallaşması hər əlavə 500 milyard dollar artdıqca həyata keçiriləcək. Əgər şirkətin bazar dəyəri 8.5 trilyon dollara qədər yüksələrsə, Musk ümumilikdə 1 trilyon dollar əldə edəcək. Tesla direktorlar şurasının sədri vurğulayır ki, Elon Musk üçün əsas məqsəd şirkətdəki təsir gücünü artırmaqdır - o, Tesla səhmlərinin 25%-ni öz əlində cəmləşdirməyi hədəfləyir. Pul şəklində veriləcək kompensasiya isə onun motivasiyasında ikincidərəcəli amildir. Hazırda Musk Tesla səhmlərinin təxminən 13%-nə sahibdir.

“O bu mövqeyinə çox aydın şəkildə sadiq qalır - məqsəd Tesla-da gələcəkdə səsvermələrdə kifayət qədər təsir gücünü qorumaqdır ki, süni intellektlə bağlı heç bir mənfi hal baş verməsin. Yəni, bu məsələ daha az kompensasiya, daha çox səsvermə üzərində təsir imkanları ilə bağlıdır” - deyə Robyn Denholm izah edib. Onun sözlərinə görə, hazırda pərakəndə investorlar Tesla səhmlərinin təxminən 30%-nə nəzarət edirlər, və ötən il səhmdarların yığıncaqlarında səsvermə aktivliyi rekord səviyyəyə çatıb. Musk üçün nəzərdə tutulan kompensasiya planı həm də bir sıra paralel məqsədləri əhatə edir: Tesla elektromobillərinin illik tədarükü 20 milyon ədəd həddini keçməli, FSD (Full Self-Driving) abunəçilərinin sayı 10 milyon nəfəri aşmalı, şirkət 1 milyon ədəd insanabənzər Optimus robotunu təqdim etməli və 1 milyon robotaksini kommersiya istifadəsinə buraxmalıdır. Bundan əlavə, Tesla-nın EBITDA metodologiyası ilə hesablanan mənfəəti yaxın 10 il ərzində mərhələli şəkildə 50 milyard dollardan 400 milyard dollara qədər artırılmalıdır.

     Tesla direktorlar şurasının sədri həmçinin səhmdarları və investorları əmin etməyə çalışıb ki, Elon Musk yaxın illərdə kompensasiyanın böyük bir hissəsini ala bilməyəcək və səhmdarlar planın həyata keçirilməsindən Musk-dan daha tez fayda görəcəklər. Robyn Denholm-un fikrincə, bu plan onun şirkətin rəhbərliyində mümkün qədər uzun müddət qalmasını və Tesla-nı uğura doğru aparmasını təşviq etmək məqsədi daşıyır. O həmçinin vurğulayıb ki, Tesla ikinci nəsil Roadster idman elektromobilinin buraxılmasından imtina etmir. Onun sözlərinə görə, robotaksilər ənənəvi idarəetmə elementləri və FSD sistemi ilə təchiz olunmuş Tesla elektromobilləri ilə yanaşı fəaliyyət göstərəcəklər.

     Tesla direktorlar şurasının sədri Optimus robotlarının imkanlarından tam razı qaldığını da bildirib. Onlar artıq yuyulmuş paltarları qatlamağı, masanı silməyi, insana əşyalar verməyi və onunla əl sıxaraq nəzakətli şəkildə salamlaşmağı bacarırlar. Denholm-un sözlərinə görə, bu robotların əllərinin toxunma həssaslığı kifayət qədər inkişaf edib. Onlar həm də çox çevik və bacarıqlıdırlar - şirkətin Palo Altodakı ofisində daim bir tərəfdən o biri tərəfə hərəkət edirlər. Nəhayət, Elon Musk tərəfindən yaradılmış xAI startapında Tesla-nın pay alması məsələsinə dair səsvermə ilə bağlı Robyn Denholm bildirib ki, bu təklif şirkət rəhbərliyi və ya direktorlar şurası tərəfindən deyil, birbaşa Tesla səhmdarları tərəfindən səsverməyə çıxarılıb.