Huawei qatlana bilən smartfonlar bazarının demək olar yarısını ələ keçirib

     Counterpoint Research analitik şirkəti 2025-ci ilin ikinci rübü üzrə qatlana bilən smartfonlar bazarı haqqında yeni hesabat dərc edib. Hesabata əsasən, Huawei 45% bazar payı ilə birinci yeri tutub. Bu, ötən illə müqayisədə əhəmiyyətli artımdır - o zaman Çin istehsalçısının bazar payı 32% idi. Analitiklər bu nəticəni ilk növbədə qatlana bilən smartfonların dünya üzrə tədarükünün böyük hissəsinin məhz Çin bazarına düşməsi ilə əlaqələndirirlər. Counterpoint Research məlumatına görə, ümumi tədarük həcmi illik hesabla 45% artıb. Ötən il 21% payla ikinci yerdə olmuş Samsung bu il hətta ikinci deyil, dördüncü yeri tutub və onun bazar payı 9% təşkil edib.

     Bu ilin ikinci rübündə ikinci yeri Motorola 28% payla əldə edib. Ötən il onun payı cəmi 14% idi. Üçüncü yeri isə digər istehsalçılar tutub, onların ümumi payı 18% olub. “Motorola ABŞ-da qatlana bilən smartfonlar bazarının artımına töhfə verərək bu seqmentdə tədarükləri ikinci rüb üzrə rekord səviyyəyə qaldırdı. Əsas model üçün 699$ pərakəndə qiymətlə seçilmiş qiymət siyasəti Motorola Razr seriyasının uğurunun əsas amillərindən biri oldu. Bu model ABŞ-da ən əlçatan qatlana bilən smartfon oldu - hələ ki, ona yaxınlaşan yoxdur” - deyə Counterpoint Research hesabatında bildirilib.

     Qeyd etmək lazımdır ki, Counterpoint Research hesabatında 2025-ci ilin üçüncü rübündə buraxılmış Samsung Galaxy Z7 seriyasının qatlana bilən smartfonları nəzərə alınmayıb. Buna görə də təəccüblü deyil ki, Samsung-un payı böyük buraxılışlardan əvvəlki ikinci rübdə nəzərəçarpacaq dərəcədə azalıb. Məlumata əsasən Samsung bu ay ilkin 200 000 plan əvəzinə 260 000 ədəd Galaxy Z Fold 7 buraxmağı planlaşdırır. Bundan əlavə, avqust ayında şirkət əvvəlcədən nəzərdə tutulmuş 320 000 əvəzinə 430 000 ədəd Galaxy Fold 7 istehsal edib. Eyni zamanda Galaxy Z Flip 7 modellərinin istehsal planları da yenidən nəzərdən keçirilib. Əvvəlcə Samsung avqustda 340 000 ədəd Galaxy Z Flip 7 buraxmağı hədəfləmişdi, lakin nəticədə 270 000 ədəd ilə kifayətlənib. Həmçinin avqustda şirkət cəmi 20 000 ədəd Galaxy Z Flip 7 FE modeli istehsal edib.