
Hyperloop One şirkəti bağlanır
Tech-Biznes
22.12.2023
Emil
Bloomberg saytının vermiş olduğu məlumata əsasən bir vaxtlar innovasiyalı şirkət hesab edilmiş Hyperloop One şirkəti bağlanır. Məlumatda qeyd edilib ki, şirkət artıq öz əməkdaşlarının çox hissəsini işdən azad edib və hal-hazırda öz aktivlərini satmağa çalışır. Satışa çıxarılmış aktivlər arasında həmçinin hyperloop nəqliyyat növü üçün nəzərdə tutulmuş boru xəttini özündə birləşdirən test meydançası da daxildir. Bununla yanaşı şirkət Los-Ancelesdəki ofisinə də bağlayıb. Aktivlərin satışlarına nəzarət edən digər əməkdaşlar öz işlərini 31 dekabr tarixində yekunlaşdıracaqlar. Qeyd etmək lazımdır ki, Hyperloop One 2014-cü ildə təsis edilmişdi.
Şirkət ümumilikdə 450 milyon dollar investisiya cəlb etmişdi. Richard Branson-un Virgin şirkəti tərəfindən investisiyaların əldə edilməsindən sonra şirkət müəyyən müddət ərzində Virgin Hyperloop One adı altında fəaliyyət göstərirdi. Lakin 2022-ci ildə şirkət hyperloop texnologiyası vasitəsilə sərnişin daşınması əvəzinə yüklərin daşınması istiqamətinə diqqət ayırandan sonra Virgin şirkəti sözügedən startapın adından öz adını götürdü. Hyperloop One şirkətinin bağlanma prosesinin yekunlaşmasından sonra onunla bağlı olan bütün intellektual mülkiyyət Dubayın DP World adlı konqlomeratına keçəcək. Belə ki, bu konqlomerat Hyperloop One şirkətinin səhmlərinin nəzarət paketinə sahibdir.
Paylaş
Bənzər xəbərlər
Ən çox oxunanlar

POCO F7 Pro və F7 Ultra flaqman smartfonları təqdim edilib - QİYMƏTİ
