iPhone 18 Pro və qatlanan iPhone-un 100-ə yaxın hissəsi ABŞ-də hazırlanır

    “Apple” deyib ki, “iPhone 18 Pro” və ilk qatlanan modeli “iPhone Duo” üçün ABŞ-də hazırlanan hissələrin sayı 100-ə yaxınlaşıb. Əsas material və komponentləri ölkənin 12-dən çox ştatındakı şirkətlər istehsal edir. Bunlara “iPhone Duo”nun korpusu üçün titan və “iPhone 18 Pro” kamerasının işıq qəbulunu tənzimləyən dəyişən diafraqma texnologiyası daxildir. “Apple” bu məqsədlə 1 yeni tərəfdaşlıq qurub, daha 1 əməkdaşlığı genişləndirib.

    ABŞ İstehsal Proqramı çərçivəsində “Apple” Pensilvaniyadakı “Perryman Company” ilə işləyəcək. Şirkət 3 il ərzində 100 milyon dollar (təxminən 170 milyon manat) ayıracaq. Bu vəsait “iPhone Duo”nun korpusunda işlədilən 5-ci dərəcəli titan növünün istehsalına yönəldiləcək. Delaverdə yerləşən “Qnity Electronics” isə “iPhone 18 Pro”nun dəyişən diafraqmalı kamera sistemi üçün xüsusi təbəqələr hazırlayacaq. Proqrama martda qoşulan tərəfdaşın istehsal etdiyi hissə, “Apple”ın məlumatına görə, şirkətin indiyədək hazırladığı ən qabaqcıl kamera sistemində işlənəcək.

    “Broadcom” iyulda açıqlanan 1,5 milyard dollarlıq (təxminən 2,55 milyard manatlıq) sərmayə çərçivəsində Koloradodakı müəssisəsini böyüdür və yeniləyir. Burada “Apple” məhsulları üçün simsiz rabitədə işlədilən radio tezlik komponentləri hazırlanacaq. Çoxillik razılaşma ərzində ABŞ-də istehsal olunan çiplərin sayı 15 milyardı keçəcək. “Corning” 2007-ci ildən “Apple” ilə işləyir və Kentukkidə “Ceramic Shield” daxil olmaqla xüsusi şüşələr hazırlayır. 2026-cı ilin sonunadək dünyada satılan bütün “iPhone” və “Apple Watch” modellərinin qoruyucu şüşəsi həmin müəssisədə istehsal olunacaq.

    “Coherent” Texasdakı müəssisəsində şaquli rezonatorlu yeni lazerlər hazırlayır. Bu lazerlər “iPhone” və “iPad” modellərində sifətin tanınması üçün işləyən “Face ID”ni, eləcə də yenilənmiş “Dynamic Island” funksiyasını işlədir. Yenilənmiş funksiya “iPhone 18 Pro” və “iPhone 18 Pro Max” modellərində olacaq. “TSMC” də Arizonadakı zavodunda 2026-cı ildə “Apple” üçün 100 milyondan çox çip hazırlayacaq. Şirkətin şimal kampusunun tikintisi davam edir.

    “Amkor Technology” 2025-ci ilin sentyabrında Arizonada ilk böyük çip qablaşdırma və sınaq müəssisəsinin təməlini qoyub. Binanın əsas konstruksiyasının tikintisinə 2026-cı ildə başlanıb. Layihənin ilk 2 mərhələsində 3500-dən çox yerli iş yeri açılacaq. “Apple” müəssisənin ilk müştərilərindən biri olacaq. Yeni tərəfdaşlıqlarda təkrar emal olunmuş materialların payı artırılacaq. Birbaşa təchizatçılar da 2030-cu ilin sonunadək istehsalda yalnız bərpa olunan enerji işlətməlidir.

    “iPhone Duo” üçün ön sifariş açılsa da, cihazı hazırda əldə etmək çətindir. “T-Mobile” bir neçə həftə əvvəl satışa çıxan “iPhone 18 Pro” üçün məhdudmüddətli kampaniyaya başlayıb. Kampaniya çərçivəsində 1000 dollar (təxminən 1700 manat) endirim edilir. Beləliklə, yekun qiymət 200 dollardan (340 manatdan) aşağı düşür. Kampaniyadan yararlanmaq üçün müştəri nömrəsini operatora köçürməli və ya uyğun telefonu vəziyyətindən asılı olmayaraq təhvil verməlidir. Həmçinin “Experience Beyond” planını seçmək lazımdır.

    Endirim birdəfəlik tətbiq olunmur. Məbləğ 36 aylıq ödəniş planı ərzində hər ay güzəşt kimi hesaba yazılır. Müştəri 3 il tamamlanmadan “T-Mobile” xidmətindən ayrılsa, smartfonun qalan borcunu ödəməli olacaq. Alış zamanı cihazın tam pərakəndə qiymətinə hesablanan yerli satış vergisi əvvəlcədən tutulur. Hər xətt üçün əlavə 35 dollar (təxminən 60 manat) standart qoşulma haqqı da ödənilir.