Meta xəbər saytları üçün yeni biznes qaydalarını təxirə saldı

    “Meta” xəbər saytlarının materiallarını süni intellekt modellərini öyrətmək üçün toplaması ilə bağlı narazılıqlardan sonra yeni biznes qaydalarını təxirə salıb. Əvvəlcə oktyabrın 30-da tətbiq olunmalı şərtlər noyabrın 20-də qüvvəyə minəcək. Şirkət bu müddətdə tərəfdaşlarına nələrin dəyişdiyini, hansı qaydaların əvvəlki kimi qaldığını izah edəcək.

    Yeni şərtlərin “Meta” platformalarından yararlanan xəbər saytlarındakı materialları sərbəst toplamağa və süni intellekt modellərinin təlimində işlətməyə icazə verəcəyi düşünülürdü. “Meta” daha sonra məhsulların “təlimi” ilə bağlı ifadəni sənəddən çıxarıb. Hüquq mütəxəssislərinə görə, bu dəyişiklik məzmunun həmin məqsədlə işlədilməyəcəyinə zəmanət vermir.

    “News/Media Alliance” cümə axşamı “Meta”nın baş direktoru Mark Zuckerbergə məktub göndərərək şərtlərin yenidən yazılmasını tələb edib. Təşkilat bu qaydaların media qurumlarına “ciddi zərər” vura biləcəyini deyib. Avropa İttifaqı və Böyük Britaniyadakı rəqəmsal reklam şirkətləri və nəşriyyatlar da tənzimləyicilərdən yeni şərtləri dayandırmağı istəyiblər.

    Təxirəsalma dövründə “Meta” saytları avtomatik yoxlayan proqramlardan necə yararlandığını daha ətraflı açıqlayacaq. Şirkətə görə, məzmun sahibləri “robots.txt” faylı ilə bu proqramların saytlarını yoxlayıb-yoxlamayacağını seçə biləcəklər. Həmin fayl avtomatik məlumat toplayan sistemə saytın hansı bölmələrinə daxil ola biləcəyini göstərir.