Microsoft ilə OpenAI arasındakı əməkdaşlıq məsələsində ziddiyyətlər yaranıb

     Microsoft şirkəti OpenAI-nin ən böyük investoru və yaxın biznes tərəfdaşı olaraq qalır, lakin The Wall Street Journal-ın yazdığına görə, son vaxtlar onların münasibətləri pisləşməyə başlayıb. OpenAI rəhbərliyi hətta ziddiyyətlər daha da dərinləşərsə, Microsoft-u ABŞ-ın antiinhisar orqanlarına şikayət etməyi nəzərdən keçirir. Mənbənin bildirdiyinə görə, OpenAI Microsoft-un süni zəka məhsullarına nəzarətini azaltmağa və tərəfdaşdan özünün kommersiya təşkilatına çevrilməsini nəzərdə tutan restrukturizasiya planına razılıq almağa çalışır. Bu “razılıq” olmadan OpenAI nə əlavə investor cəlb edə, nə də fond bazarına çıxa bilər. Əgər danışıqlarda bir irəliləyiş əldə olunmasa, OpenAI rəhbərliyi son çarə olaraq Microsoft-u qeyri-rəqabətli davranışda açıq şəkildə ittiham etməyə və şirkətlər arasında imzalanmış müqavilənin şərtlərinə dair rəsmi araşdırma aparılması üçün antiinhisar orqanlarını hərəkətə keçirməyə hazırdır.

     Məlumata əsasən bu cür əhval-ruhiyyə OpenAI və Microsoft arasında artıq 6 ildir davam edən əməkdaşlığı təhlükə altına qoyur. Problem həm də ondadır ki, bu müddət ərzində tərəfdaşlar bir-biri ilə rəqabətə başlayıblar və bu zəmin üzərində ziddiyyətlər kifayət qədər sürətlə inkişaf edə bilər. Rəsmi olaraq hər iki tərəf uzun illər səmərəli əməkdaşlığı davam etdirmək bacarığına inandıqlarını bildirirlər. 3 milyard dollar dəyərində Windsurf startapının planlaşdırılan alışı da şirkətlər arasında ziddiyyətlərin mənbəyinə çevrilib. Hazırda Microsoft OpenAI-yə məxsus bütün intellektual mülkiyyətə çıxış imkanına malikdir, proqram kodlarının yazılması sahəsində isə Microsoft-un tərəfdaşla rəqabət aparan GitHub Copilot adlı məhsulu var.

     Windsurf-un məhsulları bu sahədə rəqabət aparmalı olduğundan, OpenAI bu startapla bağlanacaq razılaşmadan sonra Microsoft-un onlara çıxış imkanı əldə etməsini istəmir. Tərəflər OpenAI-dəki səhm payının həcmi məsələsində də razılığa gələ bilmirlər. Microsoft, OpenAI-nin hazırda təklif etdiyi paydan daha çoxuna iddia edir. Restrukturizasiyanın bu ilin sonuna qədər başa çatdırılması planlaşdırılır, buna görə də danışıqların sürətləndirilməsi zəruridir. Microsoft ilkin olaraq 2019-cu ildə OpenAI-yə 1 milyard dollar investisiya yatırmışdı. Şirkət OpenAI-nin süni zəka alətlərini özünün Azure infrastrukturu vasitəsilə birinci olaraq satışa çıxarmaq hüququ və startapın bütün yeni inkişaflarına üstünlüklü çıxış imkanı əldə etmişdi.

     Yaxın vaxtlara qədər Microsoft həm də OpenAI üçün yeganə hesablama gücü təminatçısı olaraq qalırdı, baxmayaraq ki, bu ilin əvvəlində o, startapa “Stargate” layihəsi çərçivəsində öz infrastrukturunu müstəqil şəkildə qurmağa icazə verib. Hazırda OpenAI öz inkişaf etdirdiyi texnologiyaları daha geniş müştəri kütləsinə satmaqda və digər bulud hesablama provayderlərinin xidmətlərindən istifadə etməkdə maraqlıdır. Microsoft isə OpenAI-nin gələcək inkişaflarına çıxışı qoruyub saxlamaq istəyir. Lakin startapın fikrincə, şirkətlər arasındakı əməkdaşlıq müəyyən sonlu meyarlara malikdir.