Microsoft OpenAI ilə əməkdaşlığını dayandıra bilər

     Əgər əsas məsələlər üzrə - xüsusilə OpenAI kommersiya təşkilatına çevrildikdən sonra Microsoft-un oradakı payı ilə bağlı - razılıq əldə olunmasa, Microsoft OpenAI ilə tərəfdaşlıq şərtlərinin yenidən nəzərdən keçirilməsi üzrə danışıqları dayandıra bilər. Əgər əməkdaşlıq dayandırılsa belə, Microsoft mövcud müqaviləyə əsasən 2030-cu ilə qədər OpenAI texnologiyalarına çıxış imkanını qoruyacaq. Məlumata əsasən hər iki tərəf hələ də gündəlik görüşlər keçirir, lakin razılaşma hələ əldə olunmayıb. OpenAI-nin ən böyük investoru olan Microsoft, əsas məsələlərdə kompromis əldə olunmayacağı təqdirdə danışıqları tamamilə dayandırmağa hazır olduğunu bildirib. Söhbət, gələcək tərəfdaşlıq strukturundan, Microsoft-un OpenAI-dəki payından və süni zəka texnologiyalarından əldə edilən gəlirlər üzərində hüquqlardan gedir. Hazırda Microsoft OpenAI-nin süni zəka modellərini satmaq üçün eksklüziv hüquqa malikdir və bu satışlardan 20% gəlir əldə edir (bu məbləğ 92 milyard dollara qədər çata bilər).

     Bu sxem 2030-cu ilə qədər qüvvədə qalacaq və Microsoft onu yalnız adekvat alternativ olarsa dəyişməyə razıdır. Financial Times şirkətin mövqeyinə bələd olan mənbəyə istinadən yazır: “Bazar Microsoft-un nə qədər qazandığı ilə maraqlanır, OpenAI-də hansı həcmdə paya sahib olduğu ilə yox”. OpenAI isə öz növbəsində kommersiya forması alaraq IPO keçirmək istəyir. Bu məqsədlə Microsoft-un razılığı tələb olunur və bu razılıq ilin sonuna qədər rəsmiləşdirilməlidir. Əks halda, şirkət milyardlarla dollar investisiyanı, o cümlədən SoftBank-ın vəd etdiyi 30 milyard dolları itirmək riski ilə üzləşə bilər - bu vəsaitin bir hissəsi geri çəkilə bilər. Şirkətlər arasında gərginlik artır. The Wall Street Journal-ın məlumatına görə, OpenAI hətta Microsoft-u anti-rəqabət davranışında ittiham etmək ehtimalını belə nəzərdən keçirib. Microsoft bildirir ki, mövcud vəziyyət onları tam qane edir.

     “Biz mövcud müqavilədən razıyıq və 2030-cu ilə qədər onun əsasında işləməyə hazırıq”. Eyni zamanda əməkdaşlığın digər aspektləri də müzakirə olunur, o cümlədən Microsoft-un Azure bulud servisi vasitəsilə proqram təminatının satışında eksklüziv hüquqları və OpenAI-nin intellektual mülkiyyətinə, ümumi süni zəka (AGI) əldə olunana qədər, çıxış imkanı. Bununla yanaşı, Microsoft artıq süni zəka sahəsində tərəfdaşlıqları diversifikasiya etməyə başlayıb. Məsələn, yaxın vaxtlarda şirkət Elon Musk-ın xAI şirkətinə məxsus Grok modelini öz bulud xidmətinə əlavə edib. Bu fonda şirkətin bir əməkdaşı qeyd edib ki, “OpenAI artıq açıq lider deyil”. Bu isə süni zəka modelləri sahəsində rəqabətin daha da gücləndiyini göstərir. Şirkətlər arasında münasibətlər getdikcə daha gərgin hal alıb, xüsusilə də OpenAI-nin rəhbəri Sam Altman-ın infrastruktur imkanlarının genişləndirilməsi ilə bağlı tələbləri səbəbindən.

     Çünki OpenAI artıq ChatGPT-ni dəstəkləmək üçün kifayət qədər hesablama resurslarını təmin etməkdə çətinliklərlə üzləşir - bu xidmətin artıq həftəlik 500 milyon aktiv istifadəçisi var. Hətta tərəflər kompromisə gəlsələr belə, razılaşma Delaver və Kaliforniya ştatlarının baş prokurorları tərəfindən təsdiqlənməlidir və bu müqavilə Elon Musk tərəfindən məhkəmə vasitəsilə mübahisələndirilə bilər. Qeyd olunur ki, OpenAI üçün Microsoft ilə razılaşma həyati əhəmiyyət daşıyır. Əgər şirkət kommersiya qurumuna çevrilə bilməzsə, SoftBank və digər fondların investisiyaları azaldıla bilər. Məsələn, əgər razılaşma ilin sonunadək tamamlanmasa SoftBank 30 milyard dollarlıq investisiyanın 10 milyard dollarını geri çəkə bilər. Bununla belə, OpenAI-də əmindirlər ki, hətta gecikmə olsa belə, investorlar öhdəliklərinə sadiq qalacaqlar.