NVIDIA 4 trilyon dollarlıq bazar dəyərinə sahib ilk şirkət oldu

     NVIDIA növbəti bazar dəyəri rekordunu müəyyənləşdirib - özü üçün deyil, həm də ümumilikdə dünya üçün. Şirkət tarixində ilk dəfə olaraq 4 trilyon dollarlıq bazar dəyərini həddini keçib və bununla da Microsoft və Apple-ı geridə qoyub. NVIDIA-nın səhmləri dünən 2%-dən çox bahalaşıb və nəticədə istehsalçının bazar kapitallaşması 4 trilyon dolları ötüb. Səhmdarlar süni zəka sistemləri üçün sürətləndiricilər istehsal edən bu texnoloji nəhəngin səhmlərini kütləvi şəkildə almağa başlayıblar. Bu nəticəyə çatan ilk şirkət olaraq NVIDIA artıq dünyanın ən bahalı şirkəti statusunu qazanıb və daha əvvəl 3 trilyon dollar həddini aşan Microsoft və Apple-ı geridə qoyub.

     Qeyd edək ki, Microsoft eyni zamanda NVIDIA-nın ən böyük və vacib müştərilərindən biridir. NVIDIA 1993-cü ildə təsis edilib. Əvvəlcə şirkət oyun kompüterləri üçün videokartların hazırlanması ilə məşğul idi, lakin sonradan süni zəka sürətləndiricilərinin yaradılmasında da ixtisaslaşdı. Bu sahədə NVIDIA hazırda dünyanın aparıcı istehsalçısıdır. Şirkət 2 trilyon dollar həddini ilk dəfə 2024-cü ilin fevralında keçdi, həmin ilin iyununda isə artıq 3 trilyon dollar dəyərinə çatdı. Bu vaxta qədər Apple bu həddə ən çox yaxınlaşan şirkət olmuşdu - onun bazar dəyəri 2024-cü ilin dekabrında 3.915 trilyon dollar təşkil edirdi. Hazırda bazar kapitallaşması 1 trilyon dollardan çox olan texnoloji şirkətlər aşağıdakılardır:

- Microsoft - 3.756 trilyon dollar

- Apple - 3.137 trilyon dollar

- Amazon - 2.369 trilyon dollar

- Alphabet (Google) - 2.151 trilyon dollar

- Meta - 1.842 trilyon dollar

- Broadcom - 1.304 trilyon dollar

- TSMC - 1.199 trilyon dollar

Ənənəvi olaraq “trilyonerlər klubuna” daxil edilən Tesla-nın isə hazırkı bazar dəyəri 961.89 milyard dollar təşkil edir.