OpenAI-nin hazırladığı süni zəka əsaslı cihaz şirkətin gəlirlərini ciddi səviyyədə artıra bilər

     OpenAI-nin, Apple-dən ayrıldıqdan sonra öz cihazlarını inkişaf etdirməyə başlayan Jony Ive-ın io adlı startapını alması bir çoxları üçün sürpriz olub. Tərəfdaşlar gələn ilin sonuna qədər şəxsi səviyyədə süni zəka ilə işləmək üçün inqilabi bir cihazı bazara çıxarmağı planlaşdırırlar. OpenAI rəhbərliyi bu planların maliyyə baxımından da özünü doğruldacağına inanır. Şirkətin maliyyə direktoru Sarah Friar, CNBC-yə verdiyi müsahibədə bildirib ki, Jony Ive-ın startapının alınmasına sərf olunmuş 6.4 milyard dollar dəyərindəki vəsait tam şəkildə özünü doğruldacaq. Onun fikrincə, bu razılaşmanın nəticəsi olaraq OpenAI ChatGPT abunəçilərindən daha çox gəlir əldə edəcək. OpenAI-nin maliyyə direktoru qeyd edib ki, bu cür razılaşmada təkcə “mükəmməl insanlara” yox, daha geniş potensiala yatırım edilir.

     Yeni platformanı əvvəlcə konseptual olaraq yaratmaq, sonra isə reallaşdırmaq lazımdır. Cihazın istehsalı ilə bağlı tədarük zəncirlərinin necə işlədiyini anlamaq da bu prosesdə vacib rol oynayır. Xatırladaq ki, OpenAI bu alışdan sonra süni zəka dəstəyi olan şəxsi istifadəçiyə yönəlik cihazdan 100 milyon ədəd istehsal etməyi planlaşdırır. Bu cihaz şəxsi rəqəmsal köməkçi rolunu oynayacaq. Sonda, Friar-ın fikrincə, bu cür cihaz OpenAI texnologiyasına yeni istifadəçilərin çıxışını təmin edəcək və bu da şirkətin abunə gəlirlərinin artmasına səbəb olacaq. Hal-hazırda OpenAI xidmətlərindən hər həftə təxminən 500 milyon aktiv istifadəçi yararlanır, aylıq göstəricilər isə daha da yüksəkdir. OpenAI nümayəndələrinin dolaşıq açıqlamalarından belə nəticə çıxır ki, şirkət bazara sadəcə bir smartfondan daha artıq, "təsəvvürü cəlb edən" bir məhsul çıxarmağı planlaşdırır.

     Şirkətin maliyyə direktoru bildirib ki, dünyada insanlar süni zəkadan daha fəal istifadə etsinlər deyə, müxtəlif yeni biznes modelləri üzərində düşünmək lazımdır. Bu halda OpenAI, ChatGPT abunəçi bazasının genişlənməsi imkanını qiymətləndirir. Friar-ın fikrincə, şirkətin öz cihazlarını hazırlaması Apple və digər tərəfdaşlarla əməkdaşlıqdan imtina demək deyil. Yalnız bu cür çoxşaxəli fəaliyyət innovativ inkişafın yüksək templə aparılmasına imkan verir. OpenAI nümayəndəsinin sözlərindən belə anlaşılır ki, gələcək cihaz sensor ekranlardan məhrum ola bilər. “Süni zəka dövrünün başlanğıc mərhələsində çoxlu yeni platformalar və əsas yanaşmalar olacaq. Bizə elə gəlir ki, hazırkı texnologiyalar çox toxunmaya yönəlib. Halbuki insanlar görür, eşidir və danışırlar - bizim modellər isə bu sahələrdə çox uğurludur”.