Qlobal kompüter bazarında eniş sürətləndi: tədarük 20,1% azaldı

    2026-cı ilin 3-cü rübündə dünyada bazara göndərilən fərdi kompüterlərin (PC) sayı ötən ilin eyni dövrü ilə müqayisədə 20,1 faiz azalıb. “IDC”nin hesablamasına görə, bazara 15,8 milyon ədəd daha az kompüter çıxarılıb. Tədarük əvvəlki rüblə müqayisədə də 9,1 faiz geriləyib. 2026-cı ilin 2-ci rübündə illik azalma cəmi 3,8 faiz idi. Son nəticə bazardakı enişin xeyli sürətləndiyini göstərir.

    İstehsalçılar gözlənilən qiymət artımından əvvəl, 2026-cı ilin 2-ci rübündə anbarlarını daha çox məhsulla doldurublar. Buna görə adətən əvvəlki rübdən daha güclü keçən 3-cü rübdə sifarişlər azalıb. Eyni dövrdə süni intellekt məlumat mərkəzləri qrafik prosessorlar üçün lazım olan HBM adlı sürətli yaddaşa tələbi artırıb. Yaddaş istehsalçıları istehsal gücünü bu sahəyə yönəldib və nəticədə adi kompüterlər üçün daha az çip qalıb.

    Bu vəziyyət adi istifadəçilər üçün satılan yaddaşların qiymətini bəzi hallarda 500 faizədək artırıb. Hazırda 128 GB DDR5 yaddaşın qiyməti 3399 dollara (təxminən 5780 manat) çata bilir. “Micron” məlumat mərkəzlərinə daha çox diqqət ayırmaq üçün 2025-ci ilin sonunda “Crucial” RAM və SSD brendini dayandırıb. Kompüterlərin bahalaşması tələbi zəiflətdiyindən satıcılar anbarlarda həddən çox məhsul qalacağından narahatdırlar.

    Bazarın ən böyük 3 istehsalçısı daha ciddi itki ilə üzləşib. “Lenovo”nun tədarükü 22,6 faiz, bazar payı 23,8 faiz olub. “HP”nin tədarükü 30,9 faiz azalıb, bazar payı 16,5 faizə düşüb. “Dell”də azalma 25 faiz, bazar payı isə 12,1 faiz olub. “Apple”ın tədarükü 11,3 faiz, “Asus”un göstəricisi 8,6 faiz geriləyib. Digər istehsalçıların ümumi azalması 14 faiz olub.

    Yaxın aylarda anbarları boşaltmaq üçün endirimlər ola bilər, amma qiymətlərin ötənilki səviyyəyə qayıdacağı gözlənilmir. Bəzi proqnozlara görə, qıtlıq 2029-cu ilədək davam edə bilər. “Acer” rəhbəri Jason Chen Çin yaddaş istehsalçılarının istehsalı artırması ilə PC qiymətlərinin 2027-ci ilin 2-ci yarısında enəcəyini düşünür. Onun fikrincə, yalnız “LPDDR5X-9600” kimi yüksək səviyyəli yaddaşlar və “Nvidia N1” ilə “N1X” kimi az yayılan prosessorlar qıt qala bilər.