Sequoia Capital Bothanın SpaceX-in şurasına qoşulacağından xəbərsiz olub

    “Sequoia Capital” tərəfdaşlarının Roelof Bothanın yayda “SpaceX”in direktorlar şurasına qoşulacağından əvvəlcədən xəbəri olmayıb. İddiaya görə, Botha vəzifəni qəbul etməzdən əvvəl şirkətin daxili qaydalara nəzarət edən bölməsinə müraciət etməyib və tərəfdaşların razılığını almayıb. Bu qərar keçmiş rəhbərlə investisiya şirkəti arasındakı fikir ayrılığını daha da artırıb.

    “Sequoia Capital” bu həftə strukturunda ciddi dəyişikliklər də açıqlayıb. London ofisi bağlanır, yeni şirkətlərə ilkin sərmayə yatıran komanda böyümə komandasına birləşdirilir, “Scouts” proqramı isə dayandırılır. İddiaya görə, dəyişikliklər ötən il şirkətin idarəçisi vəzifəsindən ayrılan Bothanın qurduğu sistemi aradan qaldırmaq üçündür.

    Adı açıqlanmayan şəxslərdən biri deyib ki, Botha qaydalara və vəzifə bölgüsünə üstünlük verirdi, amma komandanın qalan hissəsi bu yanaşmanı bölüşmürdü. Görünür, şirkət daxilində dəyişiklikləri dəstəkləməyənlər də var. Digər bir şəxs baş verənləri Bothanın irsinin deyil, “Sequoia Capital” ənənələrinin silinməsi kimi qiymətləndirib.

    Bothanın “SpaceX”dəki yeni vəzifəsi “Sequoia Capital”ın 20 milyard dollar (təxminən 34 milyard manat) dəyərində payının alınıb-satılmasını çətinləşdirə bilər. Botha və “SpaceX” rəhbəri Elon Musk əvvəllər “PayPal”da birlikdə çalışıblar. Bununla belə, “Sequoia Capital” nümayəndəsi şirkətin Botha ilə yaxın əməkdaşlığı davam etdirdiyini deyib.