Spotify-ın keçmiş rəhbərinin musiqi startapına 9,35 milyon manat yatırılıb

    “Spotify”ın keçmiş innovasiya rəhbərinin qurduğu “A Vinyl Bar in Shibuya” musiqi ilə oynamaq üçün kiçik tətbiqlər hazırlayır. Startap ilkin mərhələdə 5,5 milyon dollar investisiya cəlb edib (təxminən 9,35 milyon manat). Şirkət mahnını verilən göstərişlə tam yaradan süni intellekt xidmətlərindən fərqli yol seçib. Burada istifadəçi səs, ritm və vokal üzərində özü işləyir.

    Layihəni quran Máuhan M Zonoozy əvvəllər “Spotify”da innovasiya rəhbəri olub, 2024-cü ildə şirkətdən ayrılıb. Daha əvvəl onun yaratdığı video kəsmə və remiks startapı “Bubbl”ı “Cricket Media” alıb. Yeni sərmayə mərhələsinə “Mantis VC”, “SV Angel”, “Boxgroup”, “Quiet Capital” və başqa fondlar qatılıb. “Spotify”ın keçmiş məzmun və reklam rəhbəri Dawn Ostroff da komandaya məsləhətçi kimi qoşulub.

    Şirkətin hazırladığı tətbiqlərin hər biri musiqi ilə fərqli formada işləyir. “Speed Surfer” brauzerdə səslənən audionun sürətini və səs effektini dəyişir. “Usersound” addakı hər hərfi musiqi notuna çevirərək səsli istifadəçi adı yaradır. “Stacks” tətbiqində 3×3 xanadakı hissələri açıb bağlayaraq vokal və musiqi alətlərini qarışdırmaq olur. “Drops” düşən kürəciklər lövhələrə toxunduqca notlar yaradır. “Sampler” isə “YouTube” videolarının müxtəlif hissələrini ritm nümunələrinə çevirir.

    Şirkətin əsas məhsulu “bop” adlı “iOS” tətbiqidir. İstifadəçi musiqi alətlərini və effektləri xanalar üzrə yerləşdirərək əsas mahnının fərqli mikslərini yarada bilir. Mahnının tempini dəyişmək, ani effektlər əlavə etmək və hazır nəticəni “TikTok”la “Instagram”da paylaşmaq olur. Komanda eyni mahnını başqa insanlarla birlikdə remiks etmək üçün çoxistifadəçili versiya üzərində də işləyir.

    Zonoozy süni intellekti hər tətbiqin mərkəzinə qoymağı düşünmür. Onun fikrincə, musiqinin gələcəyi yalnız AI-a göstəriş verərək mahnı yaratmaqdan ibarət deyil. İnsan zövqü və iştirakı da vacib olaraq qalır. Bununla belə, şirkət məhsulların hazırlanmasında və texniki sistemlərin sabit işləməsində AI-dan yararlana bilər. “A Vinyl Bar in Shibuya” bu il musiqinin müxtəlif hissələri ilə daha sərbəst işləmək üçün geniş mikser buraxmağı planlaşdırır. Burada musiqi aləti yaratmaq da olacaq.