Thrive Holdings ADT təhlükəsizlik şirkətini 15,3 milyard dollara alır

    “OpenAI”-ın tərəfdaşı “Thrive Holdings” fiziki təhlükəsizlik şirkəti “ADT”-ni tam nağd ödənişlə almağa razılaşıb. Razılaşmaya görə, “ADT”-nin hər səhmi 10 dollar (17 manat), səhmdar kapitalı isə təxminən 7,6 milyard dollar (12,92 milyard manat) dəyərində hesablanıb. Alışdan sonra “ADT” birjadan çıxacaq və özəl şirkət olacaq. Əməliyyat 2027-ci ilin ilk rübündə tamamlanmalıdır.

    Borc və digər öhdəliklər də hesablandıqda razılaşmanın ümumi dəyəri 15,3 milyard dollardır (təxminən 26,01 milyard manat). “Thrive Holdings” Coşua Kuşnerin “Thrive Capital” vençur şirkətindən ayrılan holdinqdir. Onun planı aldığı ənənəvi biznesləri süni intellektlə yeniləməkdir. Ötən il yaradılan holdinq şirkətləri uzun müddət əlində saxlamağa üstünlük verir. Hazırda onun idarə etdiyi şirkətlərin sayı 75-dən çoxdur.

    Əməkdaşlıq çərçivəsində “OpenAI” holdinqin şirkətlərinə süni intellekt modelləri və texnologiyalar verir. Həmçinin mühəndislər həmin sistemləri şirkətlərdə quraşdırırlar. Tərəflər hələ süni intellektlə işləyən konkret təhlükəsizlik məhsulu açıqlamayıblar. Lakin yeni məhsullara sərmayə qoyulacağını deyiblər. Plana əsasən, “ADT” “Thrive Holdings”in ağıllı ev təhlükəsizliyi biznesinin əsasını təşkil edəcək.

    “ADT” müstəqil ev təhlükəsizliyi xidməti göstərməklə yanaşı, böyük texnologiya şirkətləri ilə əməkdaşlığı da davam etdirir. Şirkətin texnikləri “Google Nest” cihazlarını və “Apple”-ın yeni ağıllı ev məhsullarını sata və qura bilirlər. “ADT” rəhbəri Cim DeVrisin fikrincə, yeni rəhbərliyin uzunmüddətli sərmayəsi və texnologiya təcrübəsi məhsulların daha tez yenilənməsinə, eləcə də müştəri xidmətinin yaxşılaşmasına kömək edəcək.

    Fiziki təhlükəsizlik sahəsində süni intellektdən istifadə son vaxtlar artır. “Apple” bu bazara “LG” və “Schneider Electric” ilə hazırladığı ağıllı ev və təhlükəsizlik məhsulları ilə daxil olub. “Amazon” da ağıllı ev məhsullarını yeniləyib və süni intellektlə işləyən yeni kameralar çıxarıb. Bəzi startapların həlləri arasında ərazidə hərəkət edən və mühafizəçi rolunu oynayan robot itlər də var.