TikTok-un potensial alıcılarının adları məlum olub

     ABŞ-da TikTok biznesinin potensial alıcısı, prezident Donald Trump-ın bazar günü yayımlanmış müsahibəsində bəhs etdiyi kimi, Oracle, Blackstone və vençur kapital şirkəti Andreessen Horowitz-i özündə birləşdirən investorlar konsorsiumudur. Bu barədə Bloomberg məlumat verib. Konsorsium bu sövdələşmənin əsas namizədi hesab olunurdu, lakin ABŞ və Çin arasında ticarət münasibətlərinin pisləşməsi səbəbindən qərar hələ qəbul edilməyib. Trump bildirib ki, TikTok tətbiqini onun Çinli ana şirkəti ByteDance-dən almaq üçün namizədi müəyyən edib, lakin istənilən alqı-satqı razılaşmasının yekunlaşması Çin hökumətinin və Çinin lideri Xi Jinping-in mövqeyindən asılı olacaq.

     “Sözgəlişi, TikTok üçün alıcımız var. Düşünürəm ki, mənə yəqin ki, Çinin razılığı lazım olacaq və məncə, lider Xi bunu edəcək. Bu, olduqca varlı insanlardan ibarət bir qrupdur” - deyə Trump bildirib. Bloomberg mənbəsi təsdiqləyib ki, prezidentin bəhs etdiyi alıcı qrupu Oracle və Blackstone-un da iştirak etdiyi konsorsiumdur. Bu konsorsium aprel ayında ByteDance ilə razılaşmaya çox yaxın idi, lakin ABŞ prezidentinin genişmiqyaslı gömrük rüsumları tətbiq etmək qərarından sonra Çin öz razılığını geri götürdü və danışıqlar dayandırıldı.

     Razılaşma şərtlərinə əsasən, yeni investorlar ByteDance-dən ayrılacaq ayrıca bölmədə TikTok-un ABŞ biznesinin 50%-nə sahib olacaqdılar. ByteDance-in mövcud amerikalı investorları biznesin təxminən 30%-ni saxlayacaqdı, Çin şirkətinin payı isə 20%-dən bir qədər az olacaqdı. Bu da ABŞ-ın milli təhlükəsizlik qanunvericiliyinə uyğun gəlirdi. Oracle isə videoplatformada azlıq payı alacaq və ABŞ istifadəçilərinin məlumatlarının təhlükəsizliyini təmin etmək funksiyasını yerinə yetirəcəkdi. Ağ Evin mətbuat katibi Karoline Leavitt bazar ertəsi günü bildirib ki, Çinlə danışıqlar ən yüksək səviyyədə davam edir. O, qeyd edib ki, TikTok-un ABŞ-da fəaliyyətinə qoyulmuş qadağanın daha 90 gün müddətinə təxirə salınması sayəsində tərəflərin razılaşma üzərində işi yekunlaşdırmaq imkanı var.