YouTube Donald Trump-a 24 milyon dollar təzminat ödəyəcək

     Google-a məxsus YouTube video platforması 6 yanvar 2021-ci ildən sonra Donald Trump-ın hesabının müvəqqəti bloklanmasına görə 24.5 milyon dollar təzminat ödəyəcək. Bu məbləğin 22 milyon dolları Ağ evin bal zalının tikintisinə yönəldiləcək. Qalan hissə isə məhkəmə sənədlərinə əsasən Trump-ın bir neçə həmiddiaçıları arasında bölüşdürüləcək. YouTube, digər onlayn platformalar kimi, 6 yanvar 2021-ci ildə Vaşinqtonda Trump tərəfdarları ABŞ Konqres Binasına hücum etdikdən sonra onun hesabını və onu dəstəkləyən istifadəçilərin hesablarını bloklamışdı. Kütlə ABŞ Konqresinin 2020-ci il prezident seçkilərində Joe Biden-in qələbəsini qanuni şəkildə təsdiqləməsinə mane olmaq istəyirdi.

     Bundan əvvəl Trump iddia edirdi ki, onun qələbəsi saxtakarlıq yolu ilə əlindən alınıb və Konqres Binasına yürüşündən əvvəl tərəfdarları qarşısında çıxış edərək ictimai əhval-ruhiyyəni daha da alovlandırmışdı. Onlayn-servislər Trump-ın hesablarını onun ilk müddətinin bitməsinə bir neçə gün qalmış, yeni zorakılıqlardan ehtiyat edərək bloklamışdılar. O, məhkəməyə müraciət etdi. Zuckerberg-in şirkəti və YouTube profilləri yalnız 2023-cü ilin əvvəlində bərpa etdi. Elon Musk isə Twitter-də Trump-ın hesabını 2022-ci ilin noyabrında, xidməti təxminən 44 milyard dollara satın almasından cəmi bir neçə həftə sonra açdı.

     Trump yenidən seçildikdən sonra platformalar məhkəmə iddialarını çoxmilyonlu ödənişlərlə həll etməyə üstünlük verdilər. Məsələn, Zuckerberg-in şirkəti yanvarda Trump-a 25 milyon dollar ödəməyi qəbul etdi. Bu məbləğin 22 milyon dolları Trump-ın kitabxanasına ayrıldı. Musk-ın onlayn platforması X (keçmiş Twitter) isə fevralda Trump-ın iddiasını həll etdi. Təzminat məbləği açıqlanmasa da, Wall Street Journal-ın məlumatına görə, təxminən 10 milyon dollar təşkil edib. Xatırladaq ki, Musk ikinci prezidentlik müddətinin əvvəlində Ağ ev rəhbərinin etibarlı şəxsi idi. Konqres binasına və polisə hücum etmiş prezident tərəfdarları isə Trump-ın yenidən seçilməsindən sonra onun tərəfindən əfv edilmişdi.