ABŞ-nin Hərbi Hava Qüvvələri hava məlumatına 49 milyon dollaradək ödəyəcək

    ABŞ-nin Hərbi Hava Qüvvələri “WindBorne Systems”in avtonom hava şarları ilə topladığı atmosfer məlumatlarını alacaq. Müqavilənin maksimum dəyəri 49 milyon dollar (təxminən 83,3 milyon manat)dır. 2015-ci ildə yaradılan şirkətin hazırda dünya üzrə təxminən 700 hava şarı uçur. Sensorların topladığı məlumatlar həm müştərilərə satılır, həm də şirkətin süni intellektlə işləyən hava proqnozu modelində istifadə olunur.

    “WindBorne Systems” indiyədək ABŞ-nin Milli Hava Xidməti, Hərbi Hava Qüvvələri və Hərbi Dəniz Qüvvələri ilə işləyib. Yeni razılaşma şirkətin indiyədək qatıldığı ən böyük müqavilədir. Məlumata ehtiyac yarandıqca ödəniş ediləcək, sifarişlər konkret bölgə və vaxt üçün verilə bilər. Hələlik 1,7 milyon dollarlıq (təxminən 2,89 milyon manat) məlumat sifariş olunub.

    Müqavilə rəqabətli tender keçirilmədən bağlanıb. ABŞ hökuməti qlobal məlumatları tələb olunan formada yalnız “WindBorne Systems”in toplaya bildiyi qənaətinə gəlib. Pul hava şarları şəbəkəsinin böyüdülməsinə, avadanlığın yenilənməsinə və araşdırmalara xərclənəcək. Şirkət avqustda biznesini genişləndirmək üçün B seriyası üzrə 37 milyon dollar (təxminən 62,9 milyon manat) investisiya cəlb etmişdi.

    Şirkət yayda “WeatherMesh 6” adlı proqnoz modelini də çıxarıb. “WindBorne Systems”in iddiasına görə, bu model Avropa Ortamüddətli Hava Proqnozları Mərkəzinin fizika qanunlarına əsaslanan ənənəvi sistemindən daha dəqiqdir. Süni intellekt uzun illər ərzində toplanmış hava məlumatlarını öyrənərək proqnozları daha sürətli hazırlayır. Bununla belə, hava şəraitini düzgün qiymətləndirmək üçün süni intellekt və ənənəvi modellər hələ də birlikdə işlədilir. “Google DeepMind”ın siklon proqnozu alətləri də qasırğa mövsümündə ABŞ hökumətinin qərarlarında getdikcə daha çox nəzərə alınır.

    “WindBorne Systems” avqustda mühərriksiz uçuş sistemi ilə tayfunun gözünə daxil olub məlumat toplayan ilk təşkilat olub. Şarlar hündürlüyü dəyişdirilərək, içindəki hava buraxılaraq və tarazlıq üçün daşınan qum tökülərək yönləndirilir. Beləliklə, onlar lazım olan istiqamətə gedən külək axınlarına çatır. Bu əməliyyat böyük həcmdə məlumatdan öyrənən süni intellekt modelinin real qərarlar vermək üçün işlədildiyi ilk nümunələrdən biri sayılır.