Airbus ExoMars roverinin prototipini Steam Deck əl kompüteri ilə idarə edir

    “Airbus” “ExoMars” proqramı üçün hazırlanan Mars roverinin prototipini “Steam Deck” ilə idarə edir. Böyük Britaniyada aparılan hazırlıq və sınaqlarda “Valve” şirkətinin portativ kompüteri idarəetmə qurğusu kimi işlədilir. Mars səthində hərəkət edəcək rover ora çatdıqdan sonra avtonom işləməlidir. Ancaq Yer üzündə sınaqdan keçirilərkən onu birbaşa idarə etmək lazımdır.

    Sınaqlar Mars səthinə bənzədilmiş ərazidə keçirilir. “Steam Deck”də adı açıqlanmayan xüsusi proqram işləyir. Mühəndislər roveri cihazın analoq çubuqları, tətiyə bənzər düymələri və ön düymələri ilə yönləndirirlər. Tom Scott-un “Airbus” obyektinə səfəri zamanı çəkilən görüntülərdə də bu idarəetmə üsulu göstərilib.

    “Steam Deck” əslində “Linux” sistemi ilə işləyən portativ kompüterdir. Cihazda fiziki düymələr, sensor ekran, “Wi-Fi” və “Bluetooth” bağlantısı var. Ona “Windows” da quraşdırmaq olur. Beləliklə, rover üçün hazırlanan xüsusi proqram birbaşa cihazda işləyir. Adi “DualSense” və “Xbox” kontrollerləri bu cür proqramları özləri işlədə bilmir.

    Hazırda “Airbus”un Stevenage şəhərindəki komandaları roverin 2030-cu ildə Marsa enməsinə kömək edəcək platforma üzərində işləyirlər. Layihəyə platformanın mexaniki quruluşu, temperaturun idarə edilməsi və hərəkət sistemlərinin hazırlanması daxildir. Marsa göndəriləcək roverin rəsmi adı “Rosalind Franklin” olacaq. Şirkətin sözlərinə görə, aparatın təhlükəsiz enişi 20 ildən çox davam edən işin yekunu olacaq.