Alimlər, Günəş Enerjisi ilə işləyən Atmosferik Su Ekstraksiyası (SAWE) metodundan istifadə edib, dizaynı təkmilləşdirərək, standart günəş işığı və 90% rütubət altında hər kvadrat metrə saatda 0.65 litr şirin su istehsal edə biliblər. Tədqiqatçılar, sistemin rütubətin 40%-ə qədər olduğu bölgələrdə işləyə biləcəyini bildiriblər. Sistem, su qıtlığı olan rayonlardan şəbəkədən kənar şirin su istehsalı və kənd təsərrüfatında suvarma üçün hazırlanmışdır. Havadan su toplamaq konsepsiyası və texnologiyası yeni olmasa da, mövcud günəş enerjisi ilə işləyən sistemlərin çətin olduğu bildirilir. Günəş enerjisi ilə işləyən kollektorlar, iki mərhələli dövrəni izləyir. Su, ilk olaraq havadan bir uducu material vasitəsilə çəkilir və doyduğu zaman sistem söndürülür. Daha sonra su əldə etmək üçün günəş işığı ilə qızdırılır. Komandanın fikrincə, 2 proses arasında keçid həm fiziki iş, həm də keçid sistemi tələb edir. Bu, mürəkkəbliyi və dəyəri artırır.

     KAUST-da hazırlanmış yeni kolleksiya cihazında bunların heç birinə ehtiyac yoxdur. Bunun əvəzinə, iki mərhələ arasında passiv keçid etməklə, yardım olmadan davamlı olaraq dövrə edilə bilər. Komanda, sistemi inkişaf etdirərkən təbiətdən ilham aldıqlarını və bitkilərin suyu kökündən yarpaqlarına səmərəli şəkildə daşıyan xüsusi strukturları təqlid etdiklərini deyir. Tədqiqatçılar, atmosfer suyunun tutulması və şirin su istehsalı üçün mühüm əhəmiyyət kəsb edən tranzit körpülər adlı sistem hazırlayıblar. Bu körpülər, suyu udan duz məhlulu ilə doldurulmuş şaquli mikrokanallardan ibarətdir. Su ilə zəngin məhlul, suyun bitki gövdələrindən yuxarıya doğru hərəkət etməsinə bənzər bir şəkildə kapilyar hərəkət vasitəsilə kanallardan yuxarı çəkilir. Məhlul qalınlaşdıqca yenidən aşağı yayılır və proses təkrarlanır, beləliklə daha çox su yığılır. Tədqiqatçıların fikrincə, innovativ dizayn, suyun tutulması üçün açıq hissəni şirin su istehsalı üçün qapalı hissə ilə səmərəli şəkildə birləşdirir.

     Qrupun apardığı təcrübələr, Səudiyyə Ərəbistanı şəraitində yayda hər kvadrat metrdən gündə 2-3 litr, payızda isə gündə 1-3 litr su istehsal edildiyini ortaya qoyub. Üstəlik, sistem bir neçə həftə ərzində texniki xidmət tələb etmədən işləməyi də bacarıb. Bundan əlavə, tədqiqatçılar, sistemin səhra bitkilərinin və Pekin kələminin suvarılması üçün birbaşa mənbə kimi istifadə oluna biləcəyini göstəriblər. Tədqiqatçılar inkişaf etdirdikləri sistemdə su uducu parça, ucuz hiqroskopik duz və plastik əsaslı çərçivədən istifadə ediblər. Onlar, materialları sərfəli və əlçatan olduqları üçün seçdiklərini, ona görə də aşağı gəlirli ərazilərdə geniş miqyaslı tətbiqlər üçün qiymətin aşağı olacağını söyləyirlər.