Tədqiqatçılar, qida və qənnadı məmulatlarında tez-tez istifadə edilən tartrazin (sarı qida boyası) ilə dəri toxumasını görünməz hala gətirən üsul kəşf ediblər. Təcrübələrdə siçanların dərisinə bu boyanı ehtiva edən məhlul çəkilib və nəticə olduqca təsir edici olub. Məhlul dəriyə yayıldıqda, dəri şəffaf olur və altındakı damarlar və orqanlar aydın görünür. Bu, tibbi diaqnostika və bioloji tədqiqatlar üçün böyük bir irəliləyiş ola bilər.

     Bəs bu sehrli təsir necə baş verir? Əslində, sirr tartrazin molekullarının işığı necə qəbul etməsindədir. Alimlər kəşf etdilər ki, bu molekullar xüsusi olaraq mavi və ultrabənövşəyi işığı udaraq dərinin altındakı strukturları görünən edir. Molekullar işığın dəriyə səpilməsini azaldaraq şəffaflıq yaradır. Daha da təəccüblü olanı bu prosesin tamamilə geri çevrilə bilməsidir. Dəriyə tətbiq olunan bu məhlul, sadə bir yuma prosesi ilə təmizlənə bilər və bədən qalan boya molekullarını metabolizə edərək sidiklə xaric edə bilər.

     Əvvəla deyə bilərik ki, bu ixtira, tibb aləmində böyük həyəcan yaradıb. Bu texnologiya sayəsində həkimlər, xüsusilə cərrahi əməliyyatlarda və diaqnozlarda xəstələrin orqanlarını və damarlarını daha aydın görə biləcəklər. Bu, daha az invaziv əməliyyatlara və daha dəqiq diaqnozlara yol aça bilər. Bu şəkildə düşünün, mürəkkəb bir cərrahi əməliyyat zamanı həkimlər artıq yalnız boyadan istifadə etməklə xəstənin damarlarını və ya sinirlərini daha aydın görə biləcəklər. Araşdırmanı aparan qrup, bu texnologiyanın hələ ilkin mərhələdə olduğunu bildirsə də, onun gələcəkdə insanlarda istifadə oluna biləcək potensiala malik ola biləcəyini vurğulayırlar. Hazırda yalnız siçanlar üzərində sınaqdan keçirilən üsul, yaxın illərdə tibb aləmində həqiqətən inqilabi dəyişiklik yaradacaq.