AMD şirkəti Radeon RX 7600 adlı yeni videokartını təqdim edib. Təqdim edilmiş bu yeni videokart Radeon RX 6600-ün davamçısıdır. Şirkətin verdiyi məlumata əsasən Radeon RX 6600 ilə müqayisədə Radeon RX 7600 25% daha sürətlidir. Söhbət, kompüter oyunlarında 1080p keyfiyyətində maksimal qrafik ayarlar üzrə performans göstəricilərindən gedir. Lakin bəzi oyunlarda Radeon RX 7600 modeli Radeon 6600-dən 50% daha sürətlə çalışa bilir. Radeon RX 7600 özündə 6 nanometrlik Navi 33 qrafik prosessorunu birləşdirir. Sözügedən qrafik prosessor 13.3 milyard tranzistordan ibarətdir. Yeni videokart həmçinin GDDR6 standartlı 8 GB VRAM ilə təchiz olunub və məlumatların saniyədə 288 GB sürətlə ötürülməsini təmin edir. Videokartın enerji sərfiyyatı isə 165 vatt təşkil edir. AMD Radeon RX 7600 yaxın günlərdə 270$ qiymətində satışa çıxacaq.