Birmingham Universitetindən molekulyar biogerontoloq João Pedro Magalhães-in rəhbərlik etdiyi bir qrup tərəfindən aparılan araşdırma, rilmenidinlə müalicə olunan "Caenorhabditis elegans" qurdlarının ömrünün uzandığını və sağlamlıq göstəricilərinin yaxşılaşdığını göstərib. Araşdırma nəticələri, rilmenidinin kalori məhdudlaşdırılmasına bənzər bir təsir yaratdığını üzə çıxarıb.

     Təcrübələr zamanı rilmenidinin təsiri altında olan siçanların böyrək və qaraciyər toxumalarında kalori məhdudlaşdırılması ilə əlaqəli gen fəaliyyətlərinin müşahidə edildiyi aşkar edilib. Rilmenidinin təsirinə dair başqa bir mühüm kəşf isə "nish-1" adlı bioloji siqnal qəbuledicisinin kritik rol oynadığıdır. Tədqiqatçılar, bu qəbuledicinin aradan qaldırılması halında dərmanın təsirlərinin yox olduğunu bildiriblər. Tədqiqatçılar rilmenidinin qocalmanı yavaşlatma təsiri ilə bağlı əlavə araşdırmalara ehtiyac olduğunu vurğulayırlar. İnsanlarda bu təsirin hələ təsdiqlənmədiyi qeyd edilsə də, əldə olunan nəticələr ümidvericidir.