Çinin Weibo adlı sosial şəbəkəsində ortaya çıxmış məlumata əsasən Apple bu ilin sonuna kimi iPad Air planşetini yeniləməyi planlaşdırır. Söhbət, 6-cı nəsil iPad Air modelindən gedir. Sözügedən planşetin oktyabr ayının sonunda təqdim olunacağı gözlənilir. Qeyd etmək lazımdır ki, bu məlumat Bloomberg saytının məşhur insayderi Mark Gurman-ın daha öncə iPad Air ilə bağlı vermiş olduğu məlumat ilə üst-üstə düşür. Bundan əlavə olaraq bəzi məlumatlara əsasən iPad Air 6 bu il ərzində təqdim olunacaq yeganə yeni iPad modeli olacaq. Yəni bu il yeni iPad Pro-nu və ya digər iPad modelini gözləmək lazım deyil. iPad Air 6-ya gəldikdə isə onun hansı özəlliklərə sahib olacağı bilinmir. Sadəcə güman etmək olar ki, iPad Air 6 daha öncəki iPad Air modelinin dizaynını, yeni prosessoru və kameranı əldə edəcək.