Hava çirklənməsi, şübhəsiz ki, müasir dövrün ən böyük problemlərindən biridir. Azərbaycan da daxil olmaqla dünyanın müxtəlif bölgələrində müşahidə olunan bu problem, insanlarda ciddi fiziki sağlamlıq problemlərinə səbəb olur. Lakin bu, yalnız fiziki sağlamlığa deyil, həm də zehni sağlamlığa ciddi təsir edir. Yeni bir araşdırma isə bu mövzuda vacib məlumatlar təqdim edir. Harbin Tibb Universiteti və Cranfield Universitetindən elm adamlarının apardığı tədqiqat havanın çirklənməsi ilə depressiya arasındakı qorxunc əlaqəni aşkara çıxarıb. Tədqiqatın nəticələri Environment Science və Ecotechnology jurnallarında dərc edilib.

     Araşdırma Çində 12 mindən çox iştirakçıdan toplanan məlumatlar sayəsində təhlil edilib. Nəticələrdə kükürd dioksid, incə hissəciklər və karbon monoksid kimi maddələr aşkarlanıb və bu maddələrin depressiya simptomları ilə əlaqəli olduğu müəyyən edilib. Bu çirkləndiricilərin birgə təsir göstərməsi isə zehni sağlamlıq üçün ciddi risklər yaratdığı qənaətinə gəlinib.

     Bundan başqa, fiziki sağlamlıq problemlərinin də qismən çirklənmə ilə depressiya arasındakı əlaqəyə təsir göstərdiyi ortaya çıxıb. Mütəxəssislər nəticələrin vəziyyətin nə qədər ciddi olduğunu göstərdiyini bildirərək çirklənmənin azaldılması üçün təcili tədbirlər görülməsinə çağırış ediblər: “Nəticələrimiz həm fiziki, həm də zehni sağlamlığı yaxşılaşdırmaq üçün hava keyfiyyətini artırmağın nə qədər vacib olduğunu vurğulayır. Çirkləndiricilərin qarşısını almaq, xüsusilə orta yaşlı və yaşlı insanlar kimi daha riskli qruplarda depressiyanın ictimai sağlamlığa təsirini azalda bilər”. Dünya üzrə milyonlarla insanın havanın çirklənməsinə məruz qaldığını və buna görə sağlamlıq problemləri yaşadığını bilirik. Zehni problemlərin riskinin yüksək olması isə daha qorxunc nəticələrə səbəb ola biləcəyini göstərir. Bu səbəbdən zəruri addımların dərhal atılması vacibdir.