Bill Gates növbəti 20 ildə bütün sərvətini xeyriyyəçiliyə sərf etməyi planlaşdırır

     Microsoft-un qurucusu Bill Gates təsdiqləyib ki, qarşıdakı illərdə demək olar ki, bütün sərvətindən imtina etməyi planlaşdırır. Söhbət 200 milyard dollar məbləğində vəsaitdən gedir ki, bu da xeyriyyəçiliyə yönəldiləcək. Bu barədə o, şəxsi bloqunda Bill və Melinda Gates Fondunun 20 illik fəaliyyəti ilə bağlı yekunları bölüşərkən yazıb. Gates qeyd edib ki, onun əsas məqsədi varlı insan kimi deyil, yoxsul biri kimi dünyanı tərk etməkdir, çünki “artıq olan hər şey həqiqətən ehtiyacı olanların xidmətində olmalıdır”. Onun prioritetləri dəyişməz qalır: Yoluxucu xəstəliklərlə mübarizə, səhiyyə, vaksinasiya, təhsilin dəstəklənməsi və dünyanın ən az təmin olunmuş bölgələri üçün texnologiyaların inkişafı.

     2000-ci ildən bəri fond artıq 53 milyard dollardan çox vəsaiti qlobal təşəbbüslərə yönəldib. Bunlara Gavi proqramı, poliomielitlə mübarizə və Afrikada kənd təsərrüfatının dəstəklənməsi daxildir. Gates həmçinin bildirib ki, sərvətini "geri vermək" prosesini sürətləndirmək istəyir və bu niyyəti reallaşdırmaq üçün pensiya yaşını gözləməyəcək. Onun sözlərinə görə, böyük sərvətin mənası yalnız o zaman olur ki, bu sərvət status simvoluna yox, problemlərin həllinə çevrilir. Gates humanitar layihələrə ona görə investisiya yatırır ki, şəxsi iştirakından asılı olmayan sistemli həllər yaradılsın.

- 2000-ci il - Bill və Melinda Gates Fondunun yaradılması - diqqət səhiyyə, təhsil və yoxsulluğun aradan qaldırılmasına yönəlib.

- 2002-2024-cü illər - Gavi, The Vaccine Alliance üçün 11 milyard dollardan çox vəsait - Məqsəd: Aşağı gəlirli ölkələrdə peyvəndləmə imkanlarını genişləndirmək. 100 milyonlarla uşaq peyvənd olunub.

- 2005-2020-ci illər - Poliomielitlə mübarizəyə maliyyə dəstəyi - ÜST və Rotary International ilə birlikdə - qlobal eradikasiya proqramına 4 milyard dollardan çox vəsait ayrılıb.

- 2010-cu il - The Giving Pledge təşəbbüsü - Warren Buffett-lə birlikdə milyarderləri sərvətlərinin əksəriyyətini xeyriyyəçiliyə yönəltməyə çağırıb.

- 2015-2023-cü illər - Afrika və Cənubi Asiyada kənd təsərrüfatı üçün 6 milyard dollardan çox dəstək - Kiçik fermerlərin dəstəklənməsi, aclıq və iqlim dəyişikliyi ilə mübarizə.

- 2020-2022-ci illər - COVID-19-la mübarizəyə dəstək - Tədqiqat, testlər, müalicə və peyvəndlərin ədalətli paylanmasına 2 milyard dollar investisiya yatırılıb.

     Bill və Melinda Gates Fondu dünyanın ən böyük özəl xeyriyyə fondlarından biridir. 2000-ci ildə Bill Gates və Melinda Gates tərəfindən təsis edilib. Baş ofisi ABŞ-ın Sietl şəhərində yerləşir. Fondun məqsədi qlobal səhiyyənin yaxşılaşdırılması, yoxsulluqla mübarizə, təhsilin inkişafı və texnologiyalara çıxışın təmin olunmasıdır. Əsas fəaliyyət istiqamətləri:

- Peyvəndləmə (Gavi, The Vaccine Alliance təşkilatına dəstək vasitəsilə)

- Yoluxucu xəstəliklərlə mübarizə (poliomielit, malyariya, vərəm)

- Afrika və Cənubi Asiya ölkələrində kənd təsərrüfatına dəstək

- Təhsildə innovasiyalar və rəqəmsal texnologiyalara çıxışın təmin olunması.

     Fond 2024-cü ilə olan məlumata görə 60 milyard dollardan çox aktivlə fəaliyyət göstərir və xeyriyyə təşəbbüslərinə 50 milyard dollardan çox vəsait xərcləyib. Əsas prinsiplərdən biri - uzunmüddətli sistemli təsirə malik layihələrin maliyyələşdirilməsidir.

Mənbə: Gates Notes