Litium kükürdlü batareyalar, kükürdün təbiətdə bol olması, ucuz olması, yüksək enerji sıxlığı kimi üstünlükləri olan və hazırda inkişaf mərhələsində olan bir batareya növüdür. Lakin aşağı dövriyyə ömrü, aşağı performans və anod kimi litium metalı istifadə edildikdə yaranan təhlükəsizlik problemləri kimi mənfi cəhətləri də var. Elm adamları, daha əvvəl litium-kükürdlü batareyaları yüksək temperaturda sabitləşdirmək üçün dəmir sulfid və litium metaldan hazırlanmış elektrodları ayıra bilən karbonat əsaslı elektrolitdən istifadə etməyi təklif etmişdilər. Lakin katoddan gələn kükürd, elektrolitdə həll olaraq parçalanmayan bir çöküntü yaradır və bunun hüceyrənin tutumunu azaltdığı müşahidə olunub.

     Bu problemi həll etməyə çalışan Liping Wang-ın rəhbərlik etdiyi tədqiqat qrupu, hüceyrənin doldurulma qabiliyyətinə təsir etmədən kükürdün həllini minimuma endirmək üçün katod və elektrolit arasında başqa bir təbəqə əlavə etməyi təklif edib. Çoxsaylı materiallarla təcrübə apardıqdan sonra komanda, poliakrilik turşunun (PAA) ən yaxşı seçim olduğunu aşkar edib, çünki o, 300 yükləmə-boşaltma dövründən sonra boşalma qabiliyyətini qoruyub, saxlaya bilir. Tədqiqatçılar daha sonra, PAA örtüklü dəmir sulfid katodu, karbonat elektroliti və qrafit əsaslı anoddan ibarət kisə (pouch) və düymə tipli batareya prototipləri hazırlayıblar. Tədqiqat qrupu, 100-dən çox şarj və boşalma dövründən sonra iki qatlandıqda və ya kəsildikdə belə, kisə hüceyrəsində heç bir zədələnmə olmadığını aşkar edib. Düymə tipli hüceyrənin isə 300 yükləmə-boşaltma dövründən sonra orijinal tutumunun 72%-ni qoruduğu müəyyən edilib.

     Wang, bu təəccüblü vəziyyəti belə izah edir: "Bu, yəqin ki, mexaniki qırılmaya baxmayaraq ion və elektron axınına imkan verən möhkəm və elastik bir bağlayıcı sistemdən və ya struktur dizaynından qaynaqlanır. Dövrə, kəsik səbəbindən keçirici yollar tamamilə kəsilmədiyi üçün funksiyasını davam etdirir". Tədqiqatçılar, daha sonra örtüyü litium-molibden və litium-vanadium batareyalarının katodlarına tətbiq ediblər. Wang bildirir ki, batareyalar kommersiya istifadəsinə keçərsə, yüksək enerji sıxlığı və davamlılığın vacib olduğu yerlərdə istifadə oluna bilərlər.