Yeni bir araşdırma, okeanların qaranlıq, soyuq və yüksək təzyiqli dərinliklərində düşündüyümüzdən çox daha mürəkkəb bir hidrotermal ekosistemin mövcud olduğunu ortaya qoyub. Vyana Universitetinin dəniz bioloqu Monika Bright bildirib ki, "Orada dəhlizlər olduğunu bilmirdik, bu bizi təəccübləndirdi. Bu boşluqlar daha əvvəl geoloqlar tərəfindən təsvir edilmişdi, amma orada heyvanların olduğu bilinmirdi. Biz bioloqlar isə bu boşluqların mövcudluğundan xəbərsiz idik. Ta ki, səthdə boru qurdlarının sürfələrini axtararkən qaya nümunələri toplayıb, bu boşluqları kəşf edənə qədər".

     Şərqi Sakit okean silsiləsi adlanan struktur, dəniz səthindən 2515 metr dərinlikdə yerləşir. Bu bölgənin həyat üçün uyğun olmadığı deyilir və araşdırma aparmaq üçün də çətin bir yer olduğu vurğulanır. Bright və həmkarları, Falkor adlı gəmi ilə apardıqları araşdırmalarda uzaqdan idarə olunan cihazlar vasitəsilə bu strukturdakı canlıları aşkar ediblər.

     Bright, böyük boru qurdlarının tapılmasının, sürfələrin dəniz dibinin altından yuxarıya doğru bacaları koloniyalaşdıra biləcəyi fərziyyəsini təsdiqlədiyini söyləyib. Bəzi uyğun növlər, mühit uyğun olarsa, alt səthdə məskən sala bilirlər. Dəhlizlərin nə qədər geniş əraziyə yayıldığı məlum deyil. Tədqiqatçılar bu strukturun dərin dəniz mədənçiliyi kimi təhdidlərə qarşı qorunmasının vacib olduğunu vurğulayırlar.