Özəl investorların vəsaitləri hesabına yaradılmış İsrail istehsalı kosmik aparat Ay səthinə eniş zamanı əlaqə yarada bilməyib. Nəticədə kosmik aparatın mühərriki anidən sönüb və aparat Ay səthinə çırpılaraq qəzaya uğrayıb. Bu barədə Hightech.plus saytı xəbər verib. İsrailin Beresheet adlı kosmik aparatı Ay ətrafında dövr edib, lakin onun səthinə eniş etmək istəyən zaman qəzaya uğrayıb. Kosmik aparat ilə əlaqə Ay səthindən 150 metr yüksəklikdə kəsilib. İlk öncə güman olunurdu ki, aparatın mühərriki işə düşməyib. Daha sonradan telemetriya vasitəsilə kosmik aparatda nəyin baş verdiyini müəyyən etmək mümkün olub.

    Ay səthindən 150 metr yüksəklikdə kosmik aparatın mühərriki sönüb və aparatın baş kompüterində qəza səbəbli yenidən yüklənmə baş verib. Nəticədə aparat Ay səthinə çırpılmadan öncə işə düşməyə vaxt tapa bilməyib. Deaktiv olunmazdan əvvəl kosmik aparat Ay səthi üzərində çəkilmiş son fotonu göndərə bilib. NASA-nın rəhbəri də daxil olmaqla digər mütəxəssislər İsraili qismən əldə olunmuş uğura görə təbrik ediblər. Belə ki, bu, özəl vəsaitlər ilə reallaşdırılmış ilk Ay proqramıdır. Beresheet kosmik aparatının hazırlanması və Aya göndərilməsi 100 milyon dollara başa gəılib.

    Plana əsasən Beresheet avtonom rejimdə Ay səthinə eniş etməli və Ay səthinin fotolarını Yer kürəsinə göndərməli idi. Missiya nəticələrinə əsasən Beresheet Ay ətrafında dövr etmiş ilk özəl kosmik aparat oldu. İsrail kosmik aparatı Ayətrafı orbitə göndərmiş yeddinci və onu Ay səthinə endirməyə cəhd etmiş dördüncü ölkə oldu. Bunu etməyi bacarmış hələki 3 təmsilçi var: ABŞ, Rusiya və Çin. Beresheet kosmik aparatı İsrailin SpaceIL və Israeli Aerospace Industries şirkətlərinin birgə səyləri çərçivəsində yaradılmışdı. 22 fevral tarixində həmin kosmik aparat SpaceX-in Falcon 9 raketi vasitəsilə Aya göndərilmişdi.