2023-cü ildə JWST-nin çəkdiyi bir görüntüdə, kainatın dərinliklərində olduqca diqqətçəkən bir "sual işarəsi" forması müşahidə edilmişdi. Əvvəlcə bu şəklin nə olduğu böyük bir sirr olaraq qalırdı. Bununla bağlı zaman-zaman müxtəlif fərziyyələr irəli sürülsə də, bu quruluşun uzun müddət tam dəqiqliklə nə olduğunu açıqlana bilməmişdi. Detallı müşahidələr və analizlər nəticəsində, bu sirli "sual işarəsi"nin əslində 2 qalaktikanın birləşmə prosesində olduğu ortaya çıxarıldı. Lakin bu birləşmə, şəklin tam olaraq "sual işarəsi" kimi görünməsinə səbəb ola bilməzdi.

      Bu nöqtədə qravitasiya linzası effekti işə düşərək görüntünü daha da maraqlı edib. Bu effekt, ön planda yerləşən bir qalaktika qrupunun işığı əyməsi nəticəsində, birləşən qalaktikaların görüntüsünü əyərək simvolik "sual işarəsi" formasını yaradıb. Digər mühüm kəşf isə EHT (Event Horizon Telescope) qrupunun qara dəliklər üzərindəki işləri ilə bağlıdır. 2019-cu ildə EHT, insanlıq tarixində ilk qara dəlik fotosunu çəkməyi bacarmış və bu hadisə elm dünyasında böyük rezonans doğurmuşdu. Ardınca, 2022-ci ildə isə ikinci qara dəlik fotosu da çəkilmişdi.

     İndi isə EHT qrupunun daha inkişaf etmiş texnologiya və vasitələrlə üçüncü qara dəlik fotosunu çəkməyə hazırlaşdığı bildirilir. Yeni müşahidələr, qara dəliklərin ətrafındakı maddənin davranışını və yaranan reaktivlərin necə formalaşdığını daha aydın başa düşməyimizə imkan verəcək. Qara dəliklərin kainatdakı mahiyyətini anlamaq, kosmosun ən böyük sirlərindən birini həll etməyə bir addım daha yaxınlaşmağa imkan verəcək.