Səudiyyə Ərəbistanının "The Line" layihəsi regiondakı iqlimi dəyişə bilər

     Səudiyyə Ərəbistanında regionun iqliminə bilavasitə təsir göstərə biləcək bir neçə irimiqyaslı tikinti layihəsinə start verilib. Bu barədə Financial Times nəşrinin dərc etdiyi müsahibədə bir iqlim mütəxəssisi xəbərdarlıq edib. Nəhəng “The Line” adlı layihə təsadüfən “uzanıqlı göydələn” ləqəbini almayıb. Bu, Səudiyyə Ərəbistanında inşa olunan Neom kompleksinin paytaxt şəhəri olacaq. Onun uzunluğu 170 km, hündürlüyü isə 500 metr təşkil edəcək. Kompleks Süveyş kanalının yaxınlığında yerləşəcək, çünki gələcəkdə 9 milyon nəfərlik meqapolisin resurslarla təmin olunması asan vəzifə olmayacaq. Bu quruluş Yer səthində nəhəng süni bir divar kimi dayanacaq və almaz kimi parıldayacaq. Tikili və bütövlükdə kompleks bölgədəki küləklərin istiqamətini dəyişə, eləcə də yüksək temperatur zonaları yarada bilər.

     Göydələnlərin şüşə örtüyü artıq yaxınlıqda park edilmiş avtomobillərin sözün əsl mənasında əriməsinə səbəb olmuşdu - bu, onların konstruksiyasında plastikdən daha çox istifadə olunmasının bir növ bədəli sayılır. Lakin Neom ətrafındakı flora və fauna üçün bu vəziyyətin heç bir faydası olmayacaq. Ətrafda yaşayan heyvanlar və quşlar zərər görə və yox ola bilərlər, tikinti sahəsində isə səhranın ekosistemi pozula bilər. Layihənin ilk mərhələsi - uzunluğu 2.5 km, hündürlüyü isə 500 metr olan hissəsi - 2030-cu ilə qədər tamamlanmalıdır. Lakin layihənin tam maliyyələşdirilməsi məsələsi hələ də açıq qalır. Kompleks 300 min nəfəri qəbul edə biləcək. O, əsasən turistlər üçün nəzərdə tutulub və ərəb investorlarının fikrincə, bu turistlər “ikinci neft” - yəni yerli layihələrdən gəlir mənbəyi rolunu oynamalıdırlar.

     Neom kompleksi ilə yanaşı, yaxın 2-3 il ərzində Səudiyyə Ərəbistanında daha iki nəhəng tikili layihəsinin həyata keçirilməsi planlaşdırılır - dünyanın ən hündür 1 kilometrlik göydələni olacaq JEC Tower və Empire State Building ilə müqayisə oluna biləcək həcmdə 20 göydələni yerləşdirə biləcək memarlıq kompleksi Mukaab. Bu layihələrin bəziləri hələ tam təqdim olunmasa da, onların dolayısı ilə planetin qlobal iqliminə təsir göstərə biləcəyi ehtimal edilir. Belə ki, Neom kompleksinin hələ bünövrəsi qoyulmamış olsa da, artıq onun üçün lazım olan armaturların birləşdirilməsi məqsədilə dünya üzrə istifadə edilən poladın 20%-ni istehlak edir. Bundan əlavə, Səudiyyə Ərəbistanında nəhəng bir beton istehsalı zavodu inşa olunur. Bu zavod regionun ən böyük enerji istehlakçısına çevriləcək - və çox güman ki, bu enerji nə günəşdən, nə də küləkdən alınacaq.

Mənbə: New Atlas