Əgər nəhəng meteorit düşməsi kimi anormal bir hadisə baş verməsə, əslində Yerin nə vaxt və necə məhv olacağı tam aydındır. Günəş 5-7 milyard il sonra indiki kimi görünməyəcək. Belə ki, Günəş nəhəng qırmızı ulduza çevriləcək və Günəş sistemindəki bəzi planetləri məhv edəcək. Hətta Günəşin genişlənməsi Yerin perspektivinə qədər uzanacaq. Beləliklə, bu temperatur və cazibə altında Yerdəki həyat sona çatmış olacaq. Ancaq bu, təxmin edilən sondur və çox güman ki, bəşəriyyət və ya həyat bundan çox əvvəl yox olacaq. Yeni araşdırmada alimlər superkompüter simulyasiyası vasitəsilə bəşəriyyətin nə vaxt yox olacağını hesablayıblar.

     “Nature Geoscience” jurnalında dərc olunan araşdırmaya görə, iqlim dəyişikliyi bəşəriyyətin yox olmasının əsas amillərindən biridir. Yeni simulyasiyaya görə, iqlim dəyişikliyi belə davam edərsə, bəşəriyyətin sonu gözləniləndən daha tez gələ bilər. Simulyasiya Yerin davam edən iqlimi və okean kimyası, eləcə də tektonik plitələrin vəziyyəti və biologiyası ilə bağlı müxtəlif məlumatlardan istifadə edərək Yer atmosferinin cəmi 250 milyon il ərzində CO2 ilə dolacağını bildirir. Tədqiqatçılar, bu vəziyyətin, Günəşin istiliyi ilə birləşərək Yer kürəsini bəşəriyyət də daxil olmaqla bir çox canlılar üçün yaşanmaz hala gətirəcəyini söyləyirlər.

     Qeyd etdiyimiz kimi, iqlim dəyişikliyi əsas amillərdən biri olsa da, yeganə amil tək bu deyil. Araşdırmaya görə, Yer kürəsini məməlilərin yaşaması üçün təbii olaraq yararsız hala gətirən şərtlər, tektonik plitələr ilə əlaqəli uzunmüddətli proseslər səbəbindən daha erkən inkişaf edə bilər. 250 milyon ildən sonra bütün qitələr birləşərək Yer kürəsinin növbəti superqitəsini, Pangea Ultima-nı meydana gətirəcək.

     Pangea Ultima-nın meydana gəlməsi özü ilə həddindən artıq vulkanizm və qaz emissiyalarını gətirəcək. Bunlar atmosferi həddindən artıq miqdarda CO2 ilə dolduracaq. Belə şəraitdə bəşəriyyət heç bir qida yetişdirə bilməyəcək və temperatur 40-50 dərəcəyə qədər yüksələcək. Alimlərin fikrincə, insanlar və əksər məməlilər fizioloji olaraq bu yüksək temperaturun öhdəsindən gələ bilməyəcəklər. Təxminən 252 milyon il əvvəl Pangea-nın meydana gəlməsi ilə üst-üstə düşən Perm dövrünün sonunda yox olması ilə planetin növlərinin təxminən 90 faizi ölmüşdü. İnsanlar olmadan belə, həyatın Pangea Ultima-dan bir şəkildə qaçması mümkündür.