Altsheymer xəstələrində beyində zərərli tau zülalı toplanır. Bu zülalı araşdıran alimlər onun yığılmasına səbəb ola biləcək bir ferment aşkar ediblər. Normal şərtlərdə tau zülalı sağlam beyində sinir hüceyrələrini dəstəkləyir və onların düzgün işləməsinə kömək edir. Amma Altsheymer xəstələrində bu zülal, anormal davranaraq alimlərin “düyün” adlandırdığı strukturlar yaradır. Bu düyünlər isə sinir hüceyrələri arasındakı əlaqələrə zərər vuraraq yaddaş və düşüncə qabiliyyətinə mənfi təsir göstərir.

     ABŞ-da aparılan bir tədqiqat zamanı TYK2 adlı fermentin tau zülalını zərərli hala gətirdiyi ortaya çıxıb. Bu ferment, tau zülalına xüsusi bir etiket əlavə edərək beyinin zərərli tau zülalını təmizləməsini çətinləşdirir. Tədqiqatçılar bu fermenti blokladıqları zaman siçanların beyinlərində tau yığılmasının azaldığını və sinir hüceyrələrində bərpa əlamətlərinin müşahidə edildiyini bildiriblər. Bu kəşf, Altsheymer müalicəsi ilə bağlı yeni ümidlər verir. Çünki TYK2 fermentini bloklayan bəzi dərmanlar başqa xəstəliklərin müalicəsi üçün insanlar üzərində sınaqdan keçirilib. Hazırda bu dərmanların beyinə təsir edib-etməyəcəyi və mümkün yan təsirləri öyrənilir.