Xiaomi bu il Xiaomi Pad seriyasında 3 yeni planşeti təqdim edəcək

    Xiaomi şirkəti bu il Xiaomi Pad planşet seriyasının yeni modellərini təqdim edəcək. Verilmiş məlumata əsasən şirkət bu il üçün Xiaomi Pad seriyasında 3 yeni planşet modelinin təqdimatını planlaşdırır. Hal hazırda Xiaomi Pad seriyasına 3 planşet modeli daxildir. Xiaomi Pad 5 ilə Pad 5 Pro modelləri 2021-ci ilin avqust ayında təqdim olunmuşdular. Təqdimatdan 1 il sonra isə daha bir Pro model təqdim olundu və o, 11 düym əvəzinə 12.4 düym ekran ilə təchiz olundu.

    Verilmiş yeni məlumata əsasən şirkət bu il 3 yeni planşet modelini birdən təqdim edəcək. Söhbət, Xiaomi Pad 6, Pad 6 Pro və Pad 6 Ultra modellərindən gedir. Məlumata əsasən Xiaomi Pad 6 modeli Snapdragon 870 prosessoru, Pad 6 Pro isə Snapdragon 8+ Gen 1 prosessoru vasitəsilə çalışacaq. Bununla yanaşı bu planşetlər 12 GB-a kimi RAM və 512 GB-a kimi daxili yaddaş həcmi ilə təchiz olunacaqlar. Gözləntilərə əsasən hər iki model 11 düym ekran ilə təchiz olunacaq. Xiaomi Pad 6 Ultra-nın texniki özəllikləri barəsində isə hələ ki, heç bir məlumat yoxdur.