Yupiterin qütb parıltılarının görüntüləri əldə edilib

     STScI-nin (Space Telescope Science Institute) rəsmi saytında James Webb kosmik teleskopu tərəfindən Yupiterdəki çəkilmiş qütb parıltılarının görüntüləri dərc olunub. Yer kürəsindəki şimal parıltısına bənzər olaraq, bu hadisə Yupiterin atmosferinin üst qatlarına çatan yüksək enerjili Günəş küləyi zərrəcikləri planetin maqnit sahəsi tərəfindən qütblərə doğru yönləndikdə baş verir. Lakin Yupiterdəki qütb parıltılarının başqa bir yaranma mexanizmi də mövcuddur. James Webb komandası bildirib ki, Yupiterin peyki İo-nun vulkanlarından atılan zərrəciklər də bu prosesdə iştirak edə bilər. Yupiterdəki qütb parıltılarının başqa bir fərqi isə onların parlaqlığındadır.

     Bu parıltılar Yer kürəsindəki şimal parıltısından yüzlərlə dəfə daha güclü işıq saçır. “Biz Yupiterdəki qütb parıltılarının necə dəyişdiyini görmək istəyirdik. Gözləyirdik ki, bu parıltılar yavaş-yavaş yaranıb yox olacaq, bəlkə də təxminən 15 dəqiqə ərzində. Əvəzində isə biz bütün qütb parıltısı bölgəsinin işıqla çaxdığını və partladığını, bəzən isə saniyələr içində dəyişdiyini müşahidə etdik” - deyə Lester Universitetindən astronom Jonathan Nichols bildirib. Nichols-un komandası James Webb teleskopunun yaxın infraqırmızı kamera sistemindən və Hubble teleskopunun ultrabənövşəyi sensorlarından istifadə edərək Yupiterin qütb parıltılarının yüksək dəqiqlikli, möhtəşəm görüntülərini əldə edib.

Mənbə: Space.com