4500-dən çox Google əməkdaşı rəhbərliyə iş təminatı tələbi ilə müraciət edib

    ABŞ-də Google əməkdaşları şirkətin Kaliforniya ştatının Mountain View şəhərində yerləşən baş qərargahı qarşısında etiraz aksiyası keçirərək iş yerlərinin qorunmasını tələb ediblər. Alphabet Workers Union (AWU-CWA) tərəfindən təşkil olunan aksiyada təxminən 100 əməkdaş iştirak edib. Etirazın sonunda isə 4500-dən çox işçinin imzaladığı petisiya Google-un baş icraçı direktoru Sundar Pichai və şirkətin digər rəhbərlərinə təqdim olunub.

    Həmkarlar ittifaqı Google-dan dörd əsas tələb irəli sürüb. Bunlara işdən çıxarılan əməkdaşlar üçün minimum kompensasiya zəmanətinin verilməsi, məcburi ixtisarlardan əvvəl könüllü ayrılma paketlərinin təklif olunması, performans qiymətləndirməsində istifadə olunan məcburi kvota sisteminin ləğvi və iş vizası ilə çalışan əməkdaşlara ölkədə qalmaq üçün əlavə vaxt qazandıracaq xüsusi dəstək mexanizminin yaradılması daxildir.

    AWU bildirir ki, bu təşəbbüs 2025-ci ilin əvvəlində başlayıb və indiyədək minlərlə Google əməkdaşı kampaniyaya qoşulub. Birlik hesab edir ki, süni intellekt texnologiyalarının sürətlə inkişafı fonunda əməkdaşlar gələcəkləri ilə bağlı daha çox narahatlıq keçirirlər və şirkət onların iş təhlükəsizliyi ilə bağlı daha aydın öhdəliklər götürməlidir.