Google və Apple əməkdaşlarına beynəlxalq səfər etməməyi tövsiyə edir

     Business Insider-in məlumatına görə, Google və Apple-ı təmsil edən hüquq firmaları ABŞ-yə yenidən giriş üçün viza möhürü tələb olunan əməkdaşlara yaxın müddətdə ölkədən kənara çıxmamağı tövsiyə edib. Səbəb kimi viza müraciətlərinin baxılma müddətinin adi haldan daha uzun və qeyri-müəyyən olması göstərilir.

     Fragomen-in memorandumunda qeyd olunur ki, ABŞ-yə qayıdış zamanı gözlənilməz və uzunmüddətli gecikmələr riski artdığı üçün etibarlı H-1B viza möhürü olmayan əməkdaşların beynəlxalq səfərlərdən çəkinməsi tövsiyə olunur. ABŞ Dövlət Departamentinin sözçüsü isə Business Insider-ə bildirib ki, səfirliklər hazırda hər bir viza müraciətinin daha dərindən yoxlanmasına üstünlük verir. Digər tərəfdən, Salon-un xəbərinə əsasən, dekabr ayında ABŞ iş vizalarını yeniləmək üçün Hindistana gedən yüzlərlə hindistanlı mütəxəssisin səfirlik görüşləri sosial media yoxlamaları ilə bağlı yeni tələblər səbəbilə ləğv edilib və ya təxirə salınıb.

     TechCrunch mövzu ilə bağlı Google və Apple-a müraciət edib. Qeyd edək ki, bu iki şirkət və digər iri texnologiya işəgötürənləri sentyabr ayında da oxşar xəbərdarlıqlar etmişdi. Həmin vaxt Ağ Ev H-1B viza müraciətləri üçün işəgötürənlərə 100 min dollarlıq rüsum tətbiq ediləcəyini açıqlamışdı.