macOS kodu Apple-ın 2 fərqli oyun kontrolleri üzərində işlədiyini göstərir

    “Apple” şirkətinin 2 fərqli oyun kontrolleri hazırladığı üzə çıxıb. Buna “macOS Tahoe 26.7” əməliyyat sisteminin buraxılışa hazır sınaq versiyasının kodunda görünən T6502 və T1057 model nömrələri işarə edir. Kodda hər 2 cihaz oyun kontrolleri kimi göstərilir. “Apple” bu məhsulları hələ rəsmən təsdiqləməyib. Onların satışa çıxarılıb-çıxarılmayacağı da bilinmir.

    Hər 2 kontrollerdə müasir modellərə xas əsas idarəetmə düymələri var. Bunlara ABXY düymələri, üzərinə basmaq mümkün olan 2 analoq çubuq, üst düymələr və basılma səviyyəsini müəyyən edən analoq tətiqlər daxildir. Hər modeldə “Home” və “Menu” düymələri də yer alır. Bu quruluş müasir oyunları idarə etmək üçün lazım olan əsas imkanları əhatə edir.

    T6502 daha sadə model kimi görünür və yalnız USB bağlantısını göstərir. Cihazda hərəkət sensoru, toxunma paneli, mikrofon və dinamik aşkarlanmayıb. Bununla yanaşı, ayrıca “Options” düyməsi var. Kontrollerin sol və sağ vibrasiya mühərrikləri üçün ümumilikdə 4 haptik, yəni toxunuş və titrəyiş effekti yaradan kanalı göstərilir. Bu kanalların yarısı proqram təminatı ilə idarə olunur. Belə quruluş daha dəqiq vibrasiya effektləri yarada bilər.

    Daha yüksək səviyyəli digər model həm USB, həm də Bluetooth vasitəsilə qoşulur. Kontrollerdə hərəkəti müəyyənləşdirmək üçün akselerometr və giroskop var. Bu sensorlar cihazın hərəkətlərindən oyunlarda əlavə idarəetmə üsulu kimi yararlanmağa imkan verə bilər. Modeldə “Options” düyməsi yoxdur və yalnız 1 vibrasiya mühərriki göstərilir. Kodun əvvəlində cihaz T1057, texniki məlumatlar hissəsində isə T1507 kimi qeyd olunub. Buna görə dəqiq model nömrəsi aydın deyil.

    “macOS Tahoe 26.7” kodunda kameralı “AirPods”, yeni nəsil “HomePod mini” və mümkün təhlükəsizlik kamerası ilə bağlı istinadlar da aşkarlanıb. Kontrollerlərə aid qeydlər ilkin buraxılışda açıq görünsə də, 2-ci versiyada silinib və ya gizlədilib. “Apple” hazırda öz kontrollerini satmır, lakin platformalarında “PlayStation”, “Xbox” və “Nintendo” modellərini dəstəkləyir. Şirkətin yeni kontrollerləri nə vaxt və hansı cihazlarla birlikdə təqdim edə biləcəyi hələ məlum deyil.