Modder Gebdag GTA 2-yə real işıqlandırma gətirən mod təqdim etdi

    “gebdag” adlı modder 25 sentyabrda “Grand Theft Auto 2” üçün hazırladığı “GTA2 RTX Remix” modunu göstərib. Layihə 27 illik oyuna “Nvidia”nın “RTX Remix” texnologiyasını əlavə edir. Bununla işıq və əkslər daha real görünür, günün vaxtı da dinamik dəyişir. Mod oyunun əsas mexanikasını və yuxarıdan görünüşünü qoruyur.

    1999-cu ildə çıxan oyun “DirectDraw” və köhnə “Direct3D” kimi qrafik sistemlərlə işləyir. “RTX Remix” isə “DirectDraw”ı birbaşa dəstəkləmir və əsasən “Direct3D 9” üçün hazırlanıb. Buna görə modder köhnə qrafik məlumatlarını yeni platformanın anlaya biləcəyi formaya çevirən xüsusi proqram hazırlayıb. Bu işi “gta2dx9.dll” və “gta2dx9_vid.dll” faylları görür.

    Mod quraşdırıldıqdan sonra “Anywhere City”də işıq və kölgələr daha real görünür. Partlayışlar, yanan avtomobillər və neon lövhələr ayrıca işıq saçır, onların parıltısı ətrafdakı səthlərə düşür. Dinamik gecə-gündüz sistemi günəşin batmasını və ayın çıxmasını oyunda göstərir. Oyunçu F4 düyməsi ilə menyunu açıb işıqlandırmanı zövqünə uyğun dəyişə bilər.

    Dəyişikliklər təkcə işıqlandırma ilə bitmir. Orijinal oyundakı 4:3 ekran formatının yerinə 16:9 geniş ekran işləyir və şəhərin daha böyük hissəsi görünür. “Frame Generation” texnologiyası əlavə görüntü kadrları yaradaraq tezliyi 60 FPS həddinə çatdırır. Mod avtomobillərlə piyadaların ekranın kənarında qəfil görünməsi problemini də aradan qaldırır.

    “GTA2 RTX Remix” açıq mənbəli layihədir və “GitHub”da yayımlanıb. Mod üçün “Grand Theft Auto 2” oyunu, 64 bitlik “Windows 10” və ya “Windows 11”, eləcə də lazımi “RTX Remix” iş faylları gərəkdir. Tərtibatçı onu “Rockstar Games”in 2004-cü ildə pulsuz yaydığı 9.6 versiyasında sınaqdan keçirib. “RTX Remix” daha əvvəl “Need for Speed Carbon”, “Tomb Raider”, “Max Payne” və “The Elder Scrolls III Morrowind” kimi köhnə oyunların işıqlandırmasını da yeniləyib.