Sam Altman-ın evi yenidən hücuma məruz qaldı

    Technote.az “The Verge” platformasına istinadən bildirir ki, OpenAI şirkətinin baş direktoru Sam Altman-ın San-Fransiskodakı yaşayış evi son günlər ərzində ikinci dəfə hücumun hədəfi olub. ABŞ mediasının məlumatına görə, bu dəfə hadisə silahlı insident formasında qeydə alınıb.

    Məlumata əsasən, aprelin 12-si gecə saatlarında San-Fransiskonun Russian Hill bölgəsində yerləşən ev yaxınlığında atəş açıldığı barədə polisə məlumat daxil olub. Hadisə yerində aparılan araşdırmalar zamanı müşahidə kameralarının görüntüləri əsasında müəyyən edilib ki, avtomobildə olan sərnişinlərdən biri Altman-ın yaşadığı ev istiqamətində silahdan atəş açıb. Hadisə ilə bağlı iki nəfər saxlanılıb və onlar odlu silahdan ehtiyatsız istifadə maddəsi ilə ittiham olunurlar.

    Polisin keçirdiyi əməliyyat nəticəsində şübhəlilərin yaşadığı ünvandan ümumilikdə üç ədəd odlu silah aşkarlanaraq müsadirə edilib. San-Fransisko Polis Departamenti bildirib ki, silahlı cinayətlərə qarşı sıfır tolerantlıq göstəriləcək və məsul şəxslər qanun qarşısında cavab verəcək. Qeyd edək ki, bu hadisə cəmi iki gün əvvəl baş vermiş başqa bir hücumun ardınca yaşanıb. Hazırda hüquq-mühafizə orqanları hər iki hadisənin motivlərini araşdırır.