Steam-də oyun yoxlaması 12 iş gününədək uzanıb, Valve qaydaları yeniləyib

    “Valve” son vaxtlar yoxlamaya göndərilən oyunların sayı artdığı üçün “Steam”də buraxılış qaydalarını yeniləyib. Süni intellektlə (AI) hazırlanan oyunların çoxalması da yoxlama növbəsini uzadıb. Şirkət oyunları 3-5 gün ərzində yoxlamağı hədəfləsə də, proses hazırda 12 iş gününədək uzanır. Buna görə bəzi müstəqil oyunlar planlaşdırılan tarixdən həftələrlə gec çıxır.

    Yeni qaydaya görə, tərtibatçılar oyunlarını yoxlamaya göndərməzdən əvvəl “Steam”də ən azı 5 dəqiqə işlətməlidirlər. “Valve” deyir ki, bəzi oyunlar platformada heç açılmadan yoxlamaya göndərilir. Oyunun birbaşa kompüterdə problemsiz açılması kifayət deyil. Çünki “Steam”dən quraşdırılarkən və başladılarkən sadə nasazlıqlar yarana bilər.

    Tərtibatçılar “DirectX” və “Visual C++” kimi oyunun işləməsi üçün lazım olan əlavə proqram hissələrinin düzgün qoşulduğunu da təsdiqləməlidirlər. Nailiyyətlərin hazır olub-olmadığı və yaddaş fayllarının “Steam Cloud”da düzgün qovluğa yazıldığı yoxlanacaq. Mağaza səhifəsindəki görüntülər də oyun prosesi, menyu, konsept təsviri və ya video səhnə kimi doğru kateqoriyada göstərilməlidir.

    “Valve” gecikmələri birbaşa AI ilə hazırlanan oyunlarla bağlamayıb. Ancaq açıqlanan rəqəmlər belə məzmunun platformada sürətlə artdığını göstərir. Oktyabrda “Steam”də çıxan oyunların 49,9 faizində AI ilə yaradılmış məzmun olub. İyun ayında keçirilən “Next Fest” tədbirindəki oyun demolarının təxminən 20 faizində AI-dan istifadə edildiyi qeyd olunmuşdu.

    Gecikmələr kiçik studiyaların satış planlarına da təsir göstərir. “Cubic Earth” oyununun treyleri “YouTube”da 60 000-dən çox baxış toplayıb. Oyun “Steam”də 6000-dən çox istifadəçinin istək siyahısına əlavə olunub. Lakin buraxılış gecikdiyi üçün oyunun icma səhifəsində narazılıqlar artıb. Tərtibatçının sözlərinə görə, layihə çıxmazdan əvvəl topladığı marağı itirib.