Tərtibatçı Switch oyunlarını Apple TV 4K-da işlədən layihə təqdim etdi

    “Reddit” istifadəçisi u/FloatingFalafel “Nintendo Switch” və “Switch 2” oyunlarını birbaşa “Apple TV 4K”da işlətmək üçün “TVPort” layihəsini yayımlayıb. Açıq mənbəli layihə “nxnative” alətinin dəyişdirilmiş formasıdır. Oyunlar “Mac”də yenidən yığılaraq televizor cihazına uyğunlaşdırılır. Müəllif kodu hazırlayarkən “Claude Opus 5.5” süni intellekt modelindən yararlandığını deyib.

    Layihə müəllifinin sözlərinə görə, oyunların çoxu “Nintendo Switch”dəki kimi işləyir. Ancaq bəzi oyunlar teksturaları, yəni səth görüntülərini yaddaşa fərqli qaydada yüklədiyindən əlavə düzəliş istəyir. “TVPort” oyundakı irəliləyişi göstərən yaddaş fayllarını “Mac”də və ya “iCloud”da saxlaya bilir. Görüntünün axıcılığını saniyədə 30 kadr (30 fps) və ya 60 kadr (60 fps) olaraq seçmək olur.

    Sınaqlar zamanı “Super Mario Odyssey” 60 fps sürətində işləyir və yalnız arabir kiçik ilişmələr baş verir. Şəlalələrin olduğu hissələrdə bəzi səs problemləri də qeydə alınıb. “Animal Crossing: New Horizons” 30 fps ilə məhdudlaşır, amma müəllif sınaq zamanı başqa problemlə qarşılaşmadığını deyir.

    “The Legend of Zelda: Tears of the Kingdom” oyununun normal işləməsi üçün əlavə iş görülməlidir. Sınaq zamanı “Apple TV 4K” qızıb və cihaz sürətini avtomatik azaldıb. Müəllifə görə, belə ağır oyunlarda problemləri ətraflı araşdırmaq və oyun mühərrikinin bəzi hissələrini yenidən yazmaq lazımdır. Onun fikrincə, oyun 3-cü nəsil “Apple TV 4K”da heç vaxt tam işləməyə bilər.

    Layihənin kod anbarında oyun faylları yoxdur. “TVPort”u sınamaq istəyənlər faylları qanuni şəkildə aldıqları “Nintendo Switch” kartriclərindən özləri çıxarmalıdırlar. Süni intellektlə oyun kodunu təhlil etmək və yenidən yığmaq hələ də mübahisə doğurur. “Anthropic” artıq “Claude Code”a oyunları yenidən yaratmamaq barədə göstəriş verib.